सरकार समर्थक दलहरुको बैठक भाेलि

२ माघ, काठमाडौं । सरकारलाई समर्थन गर्ने दलहरुको बैठक भाेलि बस्ने भएको छ । एमाले, माओवादी केन्द्र, रास्वपा, जसपा, राप्रपा, जनमत, नागरिक उन्मुक्ति पार्टीका शीर्ष नेताहरूबीच बैठक बस्न लागेकाे हाे ।

सरकार समर्थक दलहरुलाई मन्त्रालय भागबण्डा गर्नेबारे सरकारमा मुख्य घटक एमालेका अध्यक्ष केपी शर्मा ओलीसँग सोमबार करिब ५ घण्टा लामो छलफलपछि संचारकर्मीहरुसँगको छोटो कुराकानीमा प्रधानमन्त्री पुष्पकमल दाहाल ‘प्रचण्ड’ले सरकारलाई विश्वासको मत दिएका सबै पार्टीका नेताहरूको बैठक मंगलबार बस्ने बताए ।

कुन दललाई कति र कुन मन्त्रालय दिनेबारे आजै मात्र प्रम प्रचण्ड र ओलीले बालकोट वार्तामा सहमति गरिसकेका छन् ।

भोलि बस्ने बैठकमा आज भएका छलफलका विषयबारे कुरा राख्ने र त्यहीबाट मन्त्रालयको बाँडफाँट विषय टुंग्याएर मन्त्रिमण्डल विस्तार गर्ने तयारीमा प्रम प्रचण्ड रहेको निकटस्थ नेताहरु बताउँछन् । गएको पुष १० मा प्रचण्ड ७ दलको समर्थनमा प्रधानमन्त्री नियुक्त भएका हुन् । त्यसपछि पुष २६ मा उनले संसदबाट विश्वासको मत पाए ।