मेयर हर्क राईलाई कंक्रिटको टावरभन्दा बाँसको टावर प्यारो

२ माघ, काठमाडौं । धरान उपमहानगरपालिकाका मेयर हर्क राईले वनको सुरक्षामा खटिएका रक्षकहरुलाई अस्थायी टावर बनाइदिएका छन् ।

उनले सामाजिक संजालमा अर्बौं रुपैयाँ खर्चेर ‘ताइ न तुइ’को टावर बनाउनुको सोटो बाँसबाट बनेको टावर ठीक हुने तर्क गरेका छन् । उनले वनको रक्षार्थ खटिने रक्षकहरुलाई हावा खान मिल्ने बाँसको टावर बनाएका छन् । बाँस पनि शुभचिन्तकहरुबाट निशुल्क प्राप्त गरेका हुन् । उनले कराेडाैं रूपैयाँ खर्च गरेर सिमेन्ट, गिटी, बालुवा र रडबाट बनाइने कंक्रिटको भन्दा बाँसको टावर प्यारो ठानेका छन् ।

टावरलाई उनले मौलिकतामा आधारत रहेर बनाइएको दाबी गरेका छन् । साेमबार टावरको तस्बिरसहित सन्देश राख्दै उनले ‘अर्बौँ रुपैयाँ खर्चेर ताइ न तुईको टावर बनाउने देशमा मैले शुभचिन्तकले निस्शुल्क दिएको बाँस प्रयोग गरी बन रक्षकहरुलाई हावाखाने अस्थायी टहरा बनाइदिंदा गाली गर्नेहरुलाई बधाइ छ । यो मौलिकता हो । यो मौलिकता लोप हुन लागिसक्यो लाटा हो ।’