सरकारमा ४ उपप्रधानमन्त्री, यस्तो छ वरीयता

३ माघ, काठमाडौं । पुष्पकमल दाहाल ‘प्रचण्ड’ नेतृत्वको सरकारमा ४ जना उपप्रधानमन्त्री बनेका छन् । विष्णु पौडेल, नारायणकाजी श्रेष्ठ, रवि लामिछाने र राजेन्द्र लिङ्देन उपप्रधानमन्त्री बनेका छन् । उनीहरुमध्ये ३ जनाले पुस ११ गते नै शपथ लिएका थिए भने लिङ्देनले मंगलबार शपथ लिएका हुन् ।

राष्ट्रपति कार्यालय स्रोतका अनुसार मन्त्रिपरिषदको वरीयतामा अर्थ मन्त्रालयको समेत जिम्मेवारी सम्हालेका बिष्णु पौडेल दोस्रो स्थानमा छन् भने भौतिक पूर्वाधार मन्त्री नारायणकाजी श्रेष्ठ तेस्रो स्थानमा छन् ।

गृहमन्त्री रवि लामिछाने चौथो वरीयतामा छन् । ऊर्जा मन्त्रालयको समेत जिम्मेवारी पाएका राजेन्द्र लिङ्देन पाँचौं स्थानमा छन् ।

प्रतिनिधि सभामा लामिछाने नेतृत्वको राष्ट्रिय स्वतन्त्र पार्टीका २० सांसद छन् भने लिङ्देन नेतृत्वको राप्रपाका १४ सांसद छन् । दुवै जनाले उप्रधानमन्त्री, मन्त्री र राज्यमन्त्री बराबर पाएका छन् ।