नवनियुक्त पर्यटन मन्त्री किरातीले भने– ‘निगम सुधार्न बाघको घोडा चढ्ने आँट गर्छु’

३ माघ, काठमाडौं । नवनियुक्त पर्यटन तथा नागरिक उड्डयनमन्त्री सुदन किरातीले नेपाल वायु सेवा निगमलाई सुधार्न ‘बाघ’को घोडा चढ्ने बताएका छन् ।

मंगलबार मन्त्री पदमा शपथ लिएपछि मन्त्रालय पुगेर पदभार ग्रहण गर्दै उनले संचारकर्मीहरुसँग निगम सुधार्न जस्तो सुकै परिस्थितिको सामना गर्ने बताए ।

उनले प्रस्तावित बाराका निजगढ अन्तर्राष्ट्रिय विमानस्थल आयोजना निर्माणलाई अगाडि बढाउने बताए ।
निजगढ अन्तर्राष्ट्रिय विमानस्थललाई उनले ‘गेम चेन्जर’को संज्ञा दिएका छ ।

सरकार स्वामित्वको निगम नयाँ जहाज खरिद र संचालित अवस्थामा रहेका जहाजको मर्मतमा चरम भ्रष्टाचार र लापरवाहीको आरोप लाग्दै आइरहेको छ । जसमा मन्त्रीको भूमिका समेत तानिँदै आएको छ ।

मंगलबार शपथपछि मन्त्री किराती पार्टीकाे मुख्यालय पेरिसडाँडामा पुगेर सहिद स्तम्भमा सहिदलाई सम्मान गरेका थिए । उनी माओवादी केन्द्रकाे काेटाबाट मन्त्री बनेका हुन् । उनी तत्कालीन सशस्त्र द्वन्द्वका कमाण्डर समेत हुन् ।