प्रचण्ड क्याबिनेटमा खटपट सुरु, जनमतका खानले गरे मन्त्रालय अस्वीकार

३ माघ, काठमाडौं । झण्डै ९९ प्रतिशत विश्वासको मत प्राप्त गरेका प्रधानमन्त्री प्रचण्डलाई तनाव थपिने क्रम सुरु भएको छ । सुरुमा आफ्नै पार्टीबाट उपप्रधानमन्त्री तथा भौतिक पूर्वाधार मन्त्री बनेका नारायणकाजी श्रेष्ठले प्रधानमन्त्रीपछिको वरीयता एमालेबाट मर्थ मन्त्री बनेका विष्णुप्रसाद पौडेललाई दिएको भन्दै गुनासो गरे । अहिले पनि श्रेष्ठले प्रचण्डसँग मन खोलेर कुराकानी गरेका छैनन् ।

यसैबीच आजै मात्र मन्त्रिपरिषद् विस्तार गरेका प्रचण्डलाई जनमतबाट गुनासो र आपत्ति दुवै विषय आएको छ । आफू प्रधानमन्त्रीमा नियुक्त भएपछि राष्ट्रपतिबाट मन्त्री पदमा शपथ खुवाइएका जनमत पार्टीका अब्दुल खान आज मन्त्रालयको पदभार ग्रहण गर्न गएनन् ।

यसअघि उनलाई उद्योग मन्त्रालयको जिम्मा दिइएको थियो । सरकारमा सहभागी हुनुपहिल्यैदेखि जनमतले कृषि वा उद्योग मन्त्रालयमा दाबी गरेको थियो । तर खानलाई मन्त्री बनाउँदा मन्त्रालय नतोकी बिनाविभागीय बनाइयो । त्यसपछि उनी मन्त्री क्वाटरमै सीमित भए ।

यस्तै अवस्थाबीच सोमबार प्रचण्ड र एमालेका अध्यक्ष केपी शर्मा ओलीबीच बालकोटमा चलेको लामो समयको छmलफलपछि खानको उद्योग मन्त्रालय एमालेको भागमा पारिएको छ । एमालेबाट आज दामोदर भण्डारीले उद्योग मन्त्रीमा शपथ लिएका छन् ।

त्यो कुरा थाहा पाएपछि खान न साविक मन्त्रालय गए, न त पदभार ग्रहणका लागि नयाँ मन्त्रालय अर्थात खानेपानी मन्त्रालयमा नै पुगे । उनी पार्टी केन्द्रकै निर्देशनमा खानेपानी मन्त्रालयमा पद सम्हाल पुगेनन् ।

यसबाट प्रचण्डको क्याबिनेटमा विवाद सुरु भएको हो । जनमतका अध्यक्ष सिके राउतले बारम्बार उद्योग मन्त्रालय लिएर सरकारमा जाने र चिनी मिल संचालकबाट तराईका पीडित उखु किसानलाई न्याय र अधिकार दिने बताउँदै आएका छन् ।

३ माघ, काठमाडौं । मन्त्रालय भागवण्डा जनमत पार्टीले असन्तुष्टि जनाएको छ । मंगलबार गरिएको मन्त्रिपरिषद् विस्तारमा जनमत पार्टीलाई खानेपानी मन्त्रालय परेको थियो । खानेपानी मन्त्रालय अस्वीकार गर्दै मन्त्रीको जिम्मेवारी पाएका अब्दुल खान कार्यभार सम्हाल्न गएनन् । यसबाट क्याबिनेटमा असन्तुष्टी र खटपट सुरू भएकाे छ ।

पार्टीसँग छलफल नगरी मन्त्रालयको बाँडफाँड गरिएको प्रति आफ्नो दलको असहमति रहेको खानले अनलाइनखबरसँग बताए । ‘प्रधानमन्त्रीसँग भएको सहमति अनुसार भएन । हाम्रो चाहना अनुसारको मन्त्रालय पनि भएन’, खानले भने, ‘छलफल नै नगरी तोकिएको मन्त्रालयमा कार्यभार सम्हाल्ने कुरा पनि भएन ।’

प्रधानमन्त्रीसँग थप छलफल नगरी मन्त्रालयको कार्यभार सम्हाल्ने अवस्था नरहेको उनले बताए । जनमत पार्टीले उद्योग, वाणिज्य तथा आपुर्ति मन्त्रालयको दाबी गरेको थियो । उक्त मन्त्रालय एमालेको भागमा परेको छ । प्रधानमन्त्री पुष्पकमल दाहाल प्रचण्डले शपथ लिएकै दिनमा खानले विना विभागीय मन्त्रीको रुपमा शपथ लिएका थिए ।