बागमतीका मुख्यमन्त्री जम्कट्टेलले पाए विश्वासको मत

३ माघ, हेटौंडा । बागमती प्रदेशका मुख्यमन्त्री शालिकराम जम्कट्टेलले विश्वासको मत पाएका छन् । आज प्रदेश सभामा मत विभाजनबाट उनले विश्वासको मत लिएका हुन् । प्रदेश सभामा रहेका कूल ११० जना सदस्यमध्ये उनले १०५ सदस्यको मत पाएका छन् । मतदानमा भने १०९ सदस्य मात्र सहभागी थिए ।

बागमती प्रदेशका सभामुख भुवन पाठकले मुख्यमन्त्री जम्कट्टेलले विश्वासको मत पाएको प्रदेश सभा बैठकमा जानकारी गराएका छन्।

मुख्यमन्त्री जम्कट्टेललाई नेपाली कांग्रेस, नेकपा एमाले, नेकपा माओवादी केन्द्र, नेकपा एकीकृत समाजवादी र हाम्रो नेपाली पार्टीका सांसदले विश्वासको मत दिएका हुन् ।

नेपाल मजदुर किसान पार्टी (नेमिकपा)का सांसदहरूले जम्कट्टेललाई मत दिएनन् । नेमकिपासँग ३ सांसद छन् ।
जम्केट्टेलाई विश्वास मत दिएको नेपाली कांग्रेस भने प्रतिपक्षमा बस्ने भएको छ । कांग्रेसका श्रीराम लामिछाने, छिरिङ दोर्जे लामा, सुरजचन्द्र लामिछाने, सुरेश श्रेष्ठ, शान्ता ढकाल र क्षेत्रबहादुर बम्जन लगायत ६ सांसदले भने विश्वासको मत दिन नहुने पक्षमा उभिँदै आएपनि पार्टीको ह्वीपलाई उछिन्न सकेनन् ।

नेकपा )माओवादी केन्द्र)का संसदीय दल नेता जम्कट्टेल गत पुस २५ गते मुख्यमन्त्री नियुक्त भएका थिए ।