राष्ट्रिपतिमा कांग्रेसलाई साथ नदिने प्रधानमन्त्री प्रचण्डको संकेत

 ३ माघ, काठमाडौं । प्रधानमन्त्री पुष्पकमल दाहाल प्रचण्डले राष्ट्रपतिको निर्वाचनमा कांग्रेसलाई साथ नदिने संकत दिएका छन् । उनले सबै शक्ति बाँडफाँड सत्ता साझेदार दलहरुसँग भएको सहमति अनुसार नै अगाडी बढ्ने बताएका छन् । मंगलबार बालुवाटारमा डाकिएको सर्वदलीय बैठकपछि प्रचण्डले राष्ट्रपतिसहित संवैधानिक पदहरुको बाँडफाँटको विषयमा सत्ता साझेदार दलहरुमा भएको सहमतिमा आफू दृढ रहेको बताएका छन् ।

एनले संवैधानिक पदहरुमा दलहरुबीच सहमति जुट्ने अवस्था भए आफू त्यसका लागि सहजिकरण गर्न तयार रहेको जानकारी दिन सर्वदलीय बैठक डाकेको बताएका छन् । प्रधानमन्त्रीले सरकारका सन्दर्भमा सत्ता साझेदार दलबीचको सहमति नै लागू हुने स्पष्ट गर्दै संवैधानिक पदहरूको निर्वाचनमा सहमतिका साथ अगाडि बढ्न सकिन्छ वा सकिँदैन भन्नेबारे चासो राख्दै दलहरूको धारणा बुझेको बताएका छन् ।

प्रधानमन्त्री प्रचण्डले राष्ट्रपतिको निर्वाचनमा सघाउन चर्चा चलिरहेका बेला आफू सत्ता साझेदार दलहरूसँग गरिएको समझदारीमा दृढ रहेको र सोहीअनुसार नै मंगलबार मन्त्रिपरिषदले पूर्णता पाएको बताउँदै संवैधानिक पदहरूमा सहमति जुट्ने परिस्थितिमा आफूले त्यसको सहजीकरण मात्र गर्न खोजेको धारणा बाहिर ल्याउनुले पनि राष्ट्रपतिमा कांग्रेसले माओवादीको साथ नपाउने संकेत भएको विश्लेषण हुन थालेको छ ।

पुस २६ गतेको संसदमा सरकारलाई विश्वासको मत दिने दलहरूलाई प्रधानमन्त्री प्रचण्डले मंगलबार दिउँसो बालुवाटारमा बोलाएका थिए । बैठकमा प्रधानमन्त्री प्रचण्ड, नेपाली कांग्रेसबाट सभापति शेरबहादुर देउवा, उपसभापति पूर्णबहादुर खड्का, रामचन्द्र पौडेल, रमेश लेखक, नेकपा एमालेबाट अध्यक्ष केपी शर्मा ओली, ईश्वर पोखरेल र शंकर पोखरेल, एकीकृत समाजवादीबाट माधव नेपाल, नेपाल समाजवादी पार्टीका बाबुराम भट्टराई, राष्ट्रिय स्वतन्त्र पार्टीबाट सभापति रबि लामिछाने, नागरिक उन्मुक्ति पार्टीकी अध्यक्ष रञ्जिता श्रेष्ठ, जनमत पार्टीबाट अब्दुल खान लगायत सहभागि थिए ।