सन्दुक रुइतलाई १३ करोड रुपैयाँ बराबरको इसा अवार्ड

४ माघ, काठमाडौं । अन्तर्राष्ट्रिय क्षेत्रमा समेत प्रसिद्धि कमाएका नेपालका प्रसिद्ध नेत्ररोग विशेषज्ञ डा. सन्दुक रुइतले इसा अवार्ड पाउने भएका छन् । मानव सेवामा समर्पित बहरेनको प्रतिष्ठित यो अवार्ड मंगलबार ‘‘इसा अवार्ड फर सर्भिस टु ह्युमानिटी’ संस्थाले डा. रुइतलाई १० लाख अमेरिकी डलर अर्थात नेपाली १३ करोड रुपैयाँ बराबरको अवार्ड प्रदान गर्ने घोषणा गरेको हो ।

डा. रुइत नेपाललगायत अन्य देशका एक लाख ८० हजारभन्दा बढीको आँखाको मोतियाविन्दुको शल्यक्रिया गरेर ज्योति दिन सफल नेत्र विशेषज्ञका रुपमा विश्वमाझ परिचित छन् ।

उक्त अवार्डका लागि यस वर्ष विश्वभरबाट १३९ व्यक्ति तथा संस्था छनोटमा परेका थिए । तीमध्ये निर्णायकहरूले डा. रुइतलाई अवार्डका लागि छनोट गरेका हुन् ।