युक्रेनमा हेलिकप्टर दुर्घटना हुँदा मन्त्रीसहित १८ को मृत्यु

४ माघ, एजेन्सी । बुधबार युक्रेनको राजधानी किभस्थित स्कुद नजिकै भएको हेलिकप्टर दुर्घटनामा युक्रेनका आन्तरिक मामिला मन्त्रीसहित १८ जनाको मृत्यु भएको छ । राजधानी किभको एक स्कुल हाता नजिकै भएको दुर्घटनामा तीन जना बालबालिकासहित आन्तरिक मामिलामन्त्री र उनका सहायक मन्त्री गरी १८ जनाको मृत्यु भएको अन्तर्राष्ट्रिय सञ्चारमाध्यामले जनाएका छन् ।

बीबीसीका अनुसार दुर्घटनामा १५ जना घाइते भएका छन् । उनीहरूको अहिले नजिकका अस्पतालमा उपचार भइरहेको बताइएको छ । हेलिकप्टरमा मन्त्री डेनेस मोनास्टिर्स्कीसहित जम्मा ९ जना सवार थिए । आन्तरिक मामिलामन्त्री डेनेसका सहायकमन्त्रीको पनि मृत्यु भएको अधिकारीहरूले बताएका छन् ।

राष्ट्रिय प्रहरी प्रमुख इहोर किमेन्कोले युक्रेन सरकारको आपतकालीन सेवाको हेलिकप्टर दुर्घटनामा परेको भन्दै सामाजिक सञ्जालमा लेखेका छन् । स्कुलबाट नजिकै हेलिकप्टर दुर्घटना भएपछि स्कुलका बालबालिका र कर्मचारीहरू भागेर सुरक्षित स्थानतर्फ गएका थिए । दुर्घटनाले किन्डरगार्डेन सञ्चालन भएको भवनमा पनि ठूलो क्षति पुगेको छ । साथै आगोको मुस्लो लागिरहेको देखिएको छ ।