संसदकाे कानून पालना नगर्नु सचिवालयको बल मिच्चाइँ होः सांसद सुवाल

५ माघ, काठमाडौं । संसद भवनमा जारी संसद बैठकमा सांसदहरुले समसामयिक विषयमा धारणा राख्ने क्रम जारी छ । यही क्रममा नेमकिपाका सांसद प्रेम सुवालले संघीय ससद सचिवालयले कानुन पालना नगरेको बताएका छन् ।

संसदीय व्यवस्थामा प्रतिपक्षको भूमिका अनिवार्य मानेको बताउँदै संसदले सरकार पक्ष र प्रतिपक्षको किटान नगरी बैठक संचालन गर्नु सदन संचालनसम्बन्धी कानुन विपरीत भएको बताए । प्रतिपक्ष टुंगो नलगाएसम्म संसद बैठक संचालन नगर्न सांसद सुवालले बैठकका अध्यक्षता गरिरहेका पशुपति शमसेर जबराको ध्यानाकर्षण गराए ।

सुवालले उठाएको प्रश्नबारे सभाध्यक्ष जबराले केही बताएनन् । सरकार गठनमा नेमकिपा र राष्ट्रिय जनमोर्चाले मात्र सहभागिता जनाएका छैनन् । गएको पुष २६ मा प्रधानमन्त्री प्रचण्डले विश्वासको मत लिने निर्वाचनमा सुवाल र जनमोर्चाका अध्यक्ष समेत रहेका सांसद चित्रबहादुर केसीले विपक्षमा मतदान गरेका थिए ।

संसदका सबैभन्दा ठूलो दल नेपाली कांग्रेस सरकारमा सहभागी नभएपनि सरकार गठनमा समर्थन गरेको छ । यसपछि सरकारको प्रतिपक्षमा नेमकिपा र जनमोर्चा मात्र रहेका छन् । संसदमा सरकार पक्ष र प्रतिपक्षकाे कुर्सी छुट्याउने कानूनी व्यवस्था छ । तर संसदकाे जारी बैठकमा सभाध्यक्षले केही बताएनन् ।