ठूला दलले हामीलाई खरायो बनाएर शिकार गर्न खाेजेका छन् : सांसद चौधरी

५ माघ, काठमाडौं । सभामुख निर्वाचित गर्न प्रतिनिधिसभाको जारी बैठकमा नागरिक उन्मुक्ति पार्टीले थारु बन्दीहरुको रिहाइको माग गरेको छ ।

बैठकमा दलको तर्फबाट बोल्दै सांसद गंगाराम चौधरीले संसदका ठूला दलले अहिले पनि साना देख्ने र सानो दल देख्ने चरित्र देखाइरहेको बताए । उनले जनावरको समूहको कथा सुनाउँदै आफूहरुलाई ठूला जनावरले खरायो ठान्ने र पेट भर्ने शिकार बाहेक केही नठान्ने विगतका व्यवहारको अनुभुत भएको बताए ।

पार्टीले टिकापुर घटनाका बन्दीहरुलाई तत्काल रिहाइ गर्ने सहमतिमा सरकार गठनमा समर्थन र प्रधानमन्त्रीलाई विश्वासको पक्षमा मत दिएको स्पष्ट पारे । आफूहरु जनताको समस्या समाधान गर्न र राज्यले झुठा आरोपमा बन्दी बनाइराखेका बन्दीहरुलाई रिहा नगरे आफूहरुले सरकारलाई दिएको समर्थन कायम नरहनसक्ने तर्फ संकेत गरे । जनावरको कथामाझैं भोको पेट भर्ने वस्तु र पेटभरि खान दिएपछि चुप लाग्ने विषय नठान्न उनले सरकार र सत्ता साझेदार दलहरुसँग आग्रह गरे ।

‘नागरिक उन्मुक्ति पार्टीलाई ठूला जनावरको शिकार मृग र खरायो ठानेर सिध्याउने कोशिस गरेको अनुभूत भइरहेको छ’ उनले भने, ‘अहिले गठबन्धनका उम्मेदवारलाई मत दिन्छौं, त्यसपछि पनि ठूला दलले घमण्ड नत्यागे सरकारको समर्थन के हुन्छ ? यसै भन्न सकिँदैन ।’