जीवित शिशुलाई मृत घोषित गर्ने ३ स्वास्थ्यकर्मी कारबाहीमा

५ माघ, काठमाडौं । विराटनगरमा संचालित कोशी अस्पतालका ३ स्वास्थ्यकर्मी निलम्बनमा परेका छन् । अस्पताल प्रशासनले डा. आकाश यादव, दुई पारामेडिकल अफिसर टिका अधिकारी र लक्ष्मण माझीलाई ७ दिनका लागि निलम्बन गरेर घटनाको छानबिन सुरु गरेको हो । तीनै जनासँग २४ घण्टे स्पष्टीकरण पनि मागेको छ ।

यादवले बुधबार उपचारका लागि कोशी अस्पताल ल्याइएकी १८ दिने जीवित शिशुलाई मृत घोषणा गरेका थिए । जहदा–३ भाथीगछका दिलीप मुखियाले उपचारका लागि अस्पतालको आकस्मिक कक्षमा ल्याएको र यादव नेतृत्वको स्वास्थ्यकर्मीको टोलीले शिशुको उपचार नै नगरी मृत घोषणा गरिदिएको पीडित पक्षको दाबी छ ।

आफन्तले दाहसंस्कारको तयारीसहित शिशुलाई डिस्चार्ज गरी घर लाने तयारी भइरहँदा हात–खुट्टा चलाएपछि शिशु जीवित रहेको खुलेको थियो । पछि शिशुलाई उपचारका लागि गोल्डेन हस्पिटल भर्ना गरेका थिए ।
शिशुका आफन्तको समूहले डा. यादवमाथि कुटपिट गरेका थिए ।

घटनाको छानबिनका लागि अस्पतालका बालरोग विशेषज्ञ डा. प्रविण झाको नेतृत्वमा तीन सदस्यीय छानबिन समिति गठन गरिएको अस्पतालले जनाएको छ ।

अस्पतालका अनुसार समितिमा बाल रोग विशेषज्ञ डा. सूर्यकान्त चौधरी र रामप्रसाद नेपाल सदस्य रहेका छन् ।समितिलाई प्रतिवेदन बुझाउन ७ दिनको समय दिइएको छ।