वालिङ गोल्डकपमा प्रभु समूहले देखायो ताण्डव: विना सूचना खेल मैदानमा हेलिकप्टर अवतरण, कुटिए चालक

५, माघ, स्वाङजा । नेकपा एमालेका सांसद देवी भट्टचन नेतृत्वमा प्रभु समूह अन्तर्गत रहेको प्रभु हेलिकोप्टरले स्याङ्जाको वालिङमा भइरहेको अन्तर्राष्ट्रिय स्तरको वालिङ गोल्डकपमा ताण्डप मच्चाएको छ । वालिङमा फुटबल प्रतियोगिताको दोस्रो सेमिफाइनल खेल चलिरहँदा बिहीबार मदिरा पिएर खेल मैदानमा नै हेलिकप्टर अवतरण गरेपछि फुटबल मैदान रणभूमिमा परिणत भएको थियो ।

बिहीबार दिउँसो खेल चलिरहेका बेला आँधीखोलामा गिटी बालुवाको ठेक्का चलाउँदै आएका ठेकेदार विनोद गैरे र हेलिकोप्टर चालक रनेश डंगोलले पोखराको एक होटलमा अनियन्त्रित रुपमा मदिरा सेवन गरी खेल हेर्न प्रभु कम्पनीको हेलिकोप्टर लिएर वालिङ पुगेका थिए । सुरुमा खेल मैदान नजिकै रहेको पूर्णभवानी उच्च माविमा उक्त हेलिकोप्टर अवतरण गर्न खोजिएको थियो । तर, पाइलट नसामा चुर भएकाले विद्यालय हातामा अवतरण गराउने कार्य सफल हुन सकेन ।

अवतरण हुन नसकेर अनियन्त्रित भइरहेको हेलिकोप्टर पाइलटले खेल भइरहेको मैदानमा लगेर धसारेका थिए । अचानक रुपमा खेल भइरहेको ठाउँमा हेलिकोप्टर अवतरण हुँदा सबै आश्चर्यचकित भएका थिए । तर, केहीबेरमा नै उक्त हेलिकोप्टरबाट ठेकेदार गैरे र हेलिकोप्टर चालक मातेर लरबराउँदै जथाभावी अपशब्द प्रयोग गर्दै बाहिर आएपछि एकाएक तनाव उत्पन्न भएको थियो । ठेकेदार गैर र चालकले देवी भट्टचनको नाम लिँदै हाम्रो अनुमति बिना कसले खेल खेलाएको भन्दै खेल रोक्ने धम्की दिएपछि हानाहान सुरु भएको एक स्थानीयवासीले बताए । ।

स्थानीयका अनुसार खेल खेलिरहेका खेलाडी र दर्शकले गैरे र चालकलाई रामधुलाई दिन थालेपछि गैरे त्यहाँबाट फरार भएको स्थानीयको भनाइ छ । चालक पनि धुलाइकै क्रममा फुत्केर हेलिकोप्टरमा चढेर भागेका थिए । खेल चलिरहँदा प्रभु कम्पनीको हेलिकप्टर मैदानमा अवतरण भएपछि झडप भएको हो । बिना सूचना फुटबल मैदानमा हेलिकप्टर अवतरण गरेको भन्दै स्थानीय, आयोजक र दर्शकले पाइलट र हेलिकप्टरका यात्रुलाई रामधुलाई गरेका हुन् ।

स्थानीयको कुटाइपछि पाइलटसहित गैरे र हेलिकप्टरमा त्यहाँ पुगेका सबै सामान्य घाइते भएका थिए । झपड भएपछि वालिङबाट प्रहरीहरु  उद्दार गर्न लाग्दा चालक भागेका हुन् । प्रहरीको सुरक्षापछि केहीबेरमा हेलिकप्टर उडेको स्याङ्जाका प्रहरी नायब उपरीक्षक रविन्द्र खनालले नेपालबहसलाई जानकारी दिए । यता, कम्पनीले भने यो घटनाप्रति कुनै प्रतिक्रिया दिएको छैन् ।

हेलिकप्टर आकष्मिक अवतरण नभई ठेकेदार गैरेको बलजफ्तिमा मैदानमा अवतरण गरिएको पाइलटले बताएको स्थानीयले बताएका छन् । केही समय झडपको स्थिति बनेपनि केहिबेर पछि स्थिति सामान्य भएर खेल सुचारु भएको छ । हेलिकोप्टरका मालिक देवी भट्टचन हुन् । उनी पहिले नेपाली कांग्रेससँग आवद्ध रहेपनि अहिले ठूलो नजराना चढाएर नेकपा एमालेबाट समानुपातिक सांसद बनेका छन् । उनी प्रभु बैंकका सञ्चालक पनि हुन् । उनको कम्पनीको हेलिकोप्टर बिना अनुमति मात्र गएको थिएन , चालक मदिराले लठ्ठसमेत परेका थिए ।

यसरी स्थानीयको प्रयासमा प्रभु समूहको लापर्वाहीले वालिङमा हुन लागेको ठूलो दुर्घटना टरेको छ । यस्ता कम्पनीले राखेका सेवाका साधन र तिनको प्रयोगका लागि राखिएका व्यक्तिहरुमााथि निगरानी नगर्दा देशमा ठुला ठुला घटनााहरु घटेका छन् ।

माघ १ मा मात्रै यती एयरलाइन्सको जहाज दुर्घटना हुँदा ७२ जनाले ज्यान गुमाउन पुगेका छन् । बिहीबार प्रभुको हेलिकोप्टर पनि ठूलो दुर्घटनाबाट बचेको छ । स्थानीयले यसरी लापवार्ही गर्ने कम्पनी र चालकमाथि कारवाही गर्न स्थानीय प्रशासनसँग माग गरेका छन् । उक्त हेलिकोप्टर क्पाप्टेन रनेश डंगोल रहेको र उनलाई नेपाल नागरिक उड्डयन प्राधिकरणले तत्काल कारवाही गर्नुपर्ने माग स्थानीय र खेल आयोजकको छ ।