उपसभामुखको निर्वाचन प्रक्रिया आजदेखि सुरु, कांग्रेसले उम्मेदवारी दिने

६ माघ, काठमाडौं । प्रतिनिधिसभाको उपसभामुख पदको निर्वाचनको लागि आजदेखि प्रक्रिया सुरु हुँदैछ । संघीय संसद् सचिवालयका अनुसार आज उपसभामुख पदका लागि मनोनयन दर्ता हुनेछ । संघीय संसद् भवन नयाँबानेश्वरमा आज दिउँसो १ बजेदेखि ४ बजेसम्म उमेदवारी दर्ताका लागि समय तोकिएको छ । उपसभामुख पदको लागि भोलि दिउँसो १ बजे संसदमा मतदान हुनेछ ।

सभामुख पदममा सत्ता गठबन्धनका देवराज घिमिरे निर्वाचित भएसँगै उपसभामुख पदको निर्वाचन कार्यक्रम सार्वजनिक गर्न प्रतिनिधिसभाका ज्येष्ठ सदस्य पशुपति शमशेर जबराले बिहीबार नै निर्देशन दिएका थिए । जबराले प्रतिनिधिसभाका सचिव गोपालनाथ योगीलाई बिहीबार नै उपसभामुख निर्वाचनको कार्यतालिका सार्वजनिक गर्न निर्देशन दिएका हुन् ।

उपसभामुख सत्तारूढ गठबन्धनबाट राष्ट्रिय स्वतन्त्र पार्टीले पाउने सहमति भएको बताइएको छ । नेपाली कांग्रेसले पनि उपसभामुख निर्वाचनमा प्रतिस्पर्धा हुने बताएको छ । प्रतिनिधिसभामा बिहीबार सभामुखको निर्वाचनपछि सञ्चारकर्मीसँग संक्षिप्त कुराकानी गर्दै प्रमुख सचेतक लेखकले सभामुखमा जस्तै उपसभामुखमा पनि कांग्रेसले प्रतिस्पर्धा गर्ने बताएका थिए ।

उपसभामुखको निर्वाचन आगामी शनिबार हुँदैछ । यो प्रतिस्पर्धात्मक व्यवस्था भएकाले उपसभामुखमा कांग्रेसले नै उम्मेदवारी दिने वा अन्य दलहरूबाट उम्मेदवार हुने भन्ने विषयमा भने छलफलपछि मात्रै टुंगो लाग्ने बताएको छ । यसका लगि सरकारमा नगएका दलहरुसँग कांग्रेसले छलफल गर्दैछ ।