राफ्टिङ व्यवसाय संकटमा, लगानी गुमाउँदै व्यवसायी

६ माघ, काठमाडौं । साहसिक पर्यटनको सूचीमा रहेको राफ्टिङ व्यवसाय संकटमा परेको छ । अहिले उो व्यवसाय शून्य अवस्थामा पुगेको व्यवसायीहरुले बताएका छन् ।

व्यवसाय फस्टाएको बेला नेपाल एसोसिएसन अफ राफ्टिङ समेत गठन भएको थियो । व्यवसायीहरु यसैमा आवद्ध भएर व्यवसायलाई मर्यादित र प्रचार प्रसारमा लैजान खटिन्थे ।

तर पछिल्लो समयमा कोरोना महामारीका कारण थला परेको यो व्यवसाय उठ्न सकेको छैन । व्यवसायीहरु विस्थापित भएका छन् । एसोसिएसनका अध्यक्ष शिव अधिकारीले अहिले राफ्टिङ व्यवसाय बन्द हुने अवस्थामा पुगेको बताए । नेपाल आउने ५० प्रतिशत पर्यटक राफ्टिङ गर्न आएकामा अहिले ह्वात्तै घटेको उनले बताए ।

राफ्टिङ हुने नदीहरूमा विदेशी पर्यटक भेट्नसमेत मुश्किल भइसकेको उनको भनाइ छ । यससँगै कराेडाैं रूपैयाँ डुब्ने अवस्थामा पुगेकाे उनले बताए । राफ्टिङ संकटमा पर्नुको कारण नदीहरूमा जलविद्युत आयोजना हुनु मुख्य कारण भएकाे उनकाे भनाइ छ ।