धर्मेन्द्रलाई प्रधानमन्त्रीको प्रस्ताव, ‘कम्युनिष्टको एउटा केन्द्र बनाऊ’

६ माघ, काठमाडौं । नेत्रविक्रम नेतृत्वबाट अलग भएर नेकपा बहुमत खोलेका नेता धर्मन्द्र बास्तोलाले आफ्ना पूर्व अध्यक्षसमेत रहेका प्रधानमन्त्री पुष्पकमल दाहाल प्रचण्डसँग भेट गरेका छन् । विभिन्न मागसहितको ज्ञापनपत्र लिएर प्रधानमन्त्री प्रचण्डलाई भेट्न बास्तोला नेतृत्वको टोली शुक्रबार दिउँसो सिंहदरवार पुगेको थियो । भेटमा सबै कम्युनिष्ट एक हुनेपर्ने विषयमा छलफल भएको थियो ।

छलफलका क्रममा प्रधानमन्त्री प्रचण्डले सच्चा कम्युनिस्टहरूको एउटै केन्द्र बनाउन आवश्यक रहेको बताएका छन् । उनले संविधानमा समाजवाद उन्मुख नेपालको व्यवस्था सामान्य अर्थमा नलेखिएको भन्दै यसमा विशेष अर्थ रहेको बताए । नेपाली विशेषताको समाजवादी बाटोका बारेमा अहिले पनि बहस र छलफल चलिरहेको भन्दै प्रचण्डले नेपालमा रहेका सबै कम्युनिस्ट पार्टीहरूबीच अहिले यस विषयमा छलफल सुरू भएको र यसमा रचनात्मक भूमिका खेल्न बास्तोलालाइ ृआग्रह गरे ।

भेटको क्रममा नेकपा (बहुमत) का नेताहरूले प्रधानमन्त्रीसमक्ष राष्ट्रियता, जनतन्त्र र जनजीविकासँग सम्बन्धित विभिन्न माग प्रस्तुत गरेका थिए । ज्ञापनपत्र बुझ्दै प्रधानमन्त्रीले ध्यानाकर्षण गराएकोमा बास्तोला नेतृत्वको टोलीलाई धन्यवाद दिँदै ज्ञापनपत्रमा उठाइएका अधिकांश विषय सरकारको न्यूनतम साझा कार्यक्रममा समेटिएको बताए ।

प्रधानमन्त्रीले भनेका थिए, ‘राष्ट्रिय पुँजीको संरक्षण गर्दै आत्मनिर्भर अर्थतन्त्रको विकासका लागि सरकार प्रतिबद्ध छ । अहिलेको परिस्थितिमा कसरी अधिकतम काम गर्न सकिन्छ भन्नेमा चनाखो छु ।’ यस क्रममा प्रधानमन्त्री चण्डले जनयुद्ध, थारु, मधेस लगायत विभिन्न आन्दोलन र संघर्षका क्रममा जेलमा रहेका बन्दीहरूको रिहाइका लागि सरकार गम्भीर रहेको बताउँदै कम्युनिष्ट केन्द्रीय धरमा आएर सहकार्य गर्न बास्तोलासँग आग्रह गरेका थिए । प्रचण्डसँग छुट्टिएर मोहन बैध हुँदै चन्दसमूहमा पुगेका बास्तोलाले सो समूह छाडेको लामो समयपछि प्रचण्डलाई भेटेका हुन् ।