टि-२० लिगमा ‘स्पट फिक्सिङ’ भएको निष्कर्ष

६ माघ, काठमाडौं । हालै सम्पन्न नेपाल टी–२० क्रिकेट लिगमा ‘स्पट फिक्सिङ’ भएको पाइएको छ । केन्द्रीय अनुसन्धान ब्युरो (सिआइबी)ले गरेको अनुसन्धानमा ‘स्पट फिक्सिङ’ भएको पाइएको छ । लिगमा स्पट फिक्सिङ भएको भन्ने समाचार बाहिरिएपछि सिआइबीले डीएसपीकाे नेतृत्वमा टिम बनाइ अनुसन्धान गरिरहेको थियो ।

डिएसपीको नेतृत्वमा भइरहेको अनुसन्धानले स्पट फिक्सिङ भएको निष्कर्ष निकालेको सिआइबी स्राेतले जनाएकाे छ । ‘स्पट फिक्सिङ’मा संलग्नहरुलाई कानुनी दायरामा ल्याउने तयारी भइरहेकाे बताइएकाे छ । अनुसन्धानपछि तयार पारिएको प्रतिवेदन अर्को हप्ता सार्वजनिक गरिने स्रोतले जनायो ।

‘स्पट फिक्सिङ’मा केही व्यवस्थापन पक्षका अधिकारी, केही खेलाडी र अन्य केही व्यक्तिको संलग्नता देखिएको बताइएको छ ।

पुस २८ गते सकिएको लिग सुरू देखिनै विवादित थियो । लिगमा स्पट फिक्सिङ भएको भन्दै कमेन्टेटर सचिन तिमिल्सेनाले बिचमै भूमिका छाडेका थिए । उनले भूमिका छाडेपछि उनले लिगमा म्याच फिक्सिङ नभई स्पष्ट फिक्सिङ भइरहेको खुलासा गरेका थिए ।

नेपाल टी(२० लिग आयोजनाको सम्पूर्ण अधिकार नेपाल क्रिकेट संघ (क्यान)ले भारतीय कम्पनी सेभेन थ्री स्पोर्ट्सलाई बिना टेन्डर आयोजना अधिकार दिएपछि लिग संचालनमा शंका र विवादित बनेको थियो । लिग विवादित बनेपछि सेभेन थ्री स्पोर्ट्सका मालिक जतिन अलुवालिया भारत हिँडेका थिए ।

लिग विवादित बनेपछि अनुसन्धानका लागि आइसिसीका प्रतिनिधि टोली समेत नेपाल आएका थिए । टोलीले सिआइबीसँग पनि गएर भेटेको थियो ।

लिगमा सहभागी काठमाडौं नाइट्सका कप्तान ज्ञानेन्द्र मल्लले आफ्नो टिममा फिक्सिङका लागि प्रस्ताव आएको बताएका थिए ।

साथै क्यानले वीर सिंहको नेतृत्वमा खडा गरेको एन्टी करप्सन युनिट लिगमा फिक्सिङसहित अवैध गतिविधिको उजुरी आएको थियो । नियमअनुसार पहिला युटिनमा उजुरी पर्नुपर्ने व्यवस्था छ । अनुसन्धानका लागि सीआईबीमा पनि उजुरी परेकाे थियाे ।