सुरक्षा संयन्त्रले काम नगरेको हो कि गृहमन्त्रीले नगरेको ?: कांग्रेस सांसद पाण्डे

७ माघ, काठमाडौं । नेपाली कांग्रेसका सांसद बद्री पाण्डेले ज्यान मुद्दामा फरार अभियुक्त लक्ष्मी महतो कोइरीलाई किन पक्राउ नगरिएको भन्दै प्रश्न उठाएका छन् । शनिबारको संसद बैठकमा पाण्डेले गृह मन्त्रालयले सांसद कोइरीलाई किन पक्राउ नगरेको भन्दै प्रश्न उठाएका हुन् ।

उनले सुरक्षा संयन्त्र र गृह मन्त्रालयले किन काम गर्न नसकेको भन्दै प्रश्न गरे । ‘आजै मात्र कुरा उठ्यो, ज्यान मुद्धामा फरारलाई किन समातिएन ? गृह मन्त्रालयले निर्देशन दिएको छ । त्यो पालना भएन, उनले भने, या त गृहमन्त्रीले दिएको निर्देशन पालना गर्ने संयन्त्र भएन या त निर्देशन समिति भयो । यस्ताे ढंगले कसरी चल्छ ?’

उनले सरकारलाई विश्वासको मत मात्र दिएको भन्दै कांग्रेसले सरकारलाई समर्थन भने नदिएको उल्लेख गरे । पाण्डेले सभामुखमा सत्ता पक्षको उम्मेदवार निर्वाचित भएपछि उपसभामुखमा प्रतिपक्षबाट निर्वाचित हुँदा राम्रो हुने बताए । शनिबार प्रतिनिधिसभामा मुक्ताकुमारी यादवलाई उपसभामुखमा निर्वाचित गरियोस् भन्ने प्रस्ताव प्रस्तुत गर्दै सांसद पाण्डेले संविधानको आशय अनुसार पनि उपसभामुख प्रतिपक्षले पाउँदा राम्रो हुने बताए ।

’संविधानले भिन्न दल भनेको छ । फरक दल भनेको फरक पक्ष हो । सत्ता पक्षले प्रस्ताव गरेको व्यक्ति सभामुखमा निर्वाचित भएपछि प्रतिपक्षले प्रस्ताव गरेको व्यक्ति उपसभामुखमा निर्वाचित हुँदा संसद्को गरिमा अझ बढ्छ । इन्दिरा राना मगर पनि उत्तिकै सम्मानित व्यक्ति हुनुहुन्छ । दुवै जना उत्तिकै सम्मानित व्यक्ति हुनुहुन्छ । भौगोलिक हिसाबले पनि सभामुख र उपसभामुख एउटै क्षेत्रबाट हुने भएकाले पनि भौगोलिक विविधताका हिसाबले मुक्ताकुमारी यादवलाई निर्वाचित गर्नुपर्ने हुन्छ,’ उनले भने ।

मुक्ताकुमारी एक अनुभवी व्यक्ति भएकाले पनि संसद्को गरिमा बढाउन उनलाई जिताउन आवश्यक रहेको पाण्डेले बताए । उनले भने, ’मुक्ताकुमारी यादव मधेसकी चेली हुनुहुन्छ । उहाँ एउटा अनुभवी व्यक्ति हुनुहुन्छ, संसदीय पद्धति र अभ्यासभित्र उहाँ एक अनुभवी हुनुहुन्छ । २०७० सालमा संविधानसभा र २०७४ मा राष्ट्रिय सभा सदस्य हुनुभयो । उहाँले संसदीय समितिमा बसेर पनि कुशलतापूर्वक भूमिका निर्वाह गर्नु भएको छ ।’

त्यस्तै पाण्डेले सभामुख देवराज घिमिरेलाई बधाई दिँदै सभालाई निष्पक्ष ढंगले सञ्चालन गर्ने अपेक्षा लिएको बताए । उनले अगाडि भने, ’संसदीय अभ्यासका अनगिन्ती अनुभवहरू छन् केही तिता अनुभव छन् केही मीठा अनुभव छन् । केही सकारात्मक नजिरहरू छन् केही नकारातम्क नजिरहरू छन् । यी कुरालाई मध्यनजर गर्दै यहाँले सभालाई सञ्चालन गर्नुहुनेछ भन्ने आशा छ ।’