बुद्ध एयरद्वारा २५ वर्ष पुरानो जहाज बिक्री

९ माघ, काठमाडौं । आन्तरिक उडानमा अब्बल मानिने एयरले पहिलो व्यावसायिक उडान गरेको बिचक्राफ्ट जहाज क्यानेडियन कम्पनीलाई बिक्री गरेको छ ।

अढाई दशकअघि बुद्धले १९ सिट क्षमताका बिचक्राफ्ट जहाजबाट व्यावसायिक उडान थालनी गरेको थियो । अहिले बुद्धले दुईवटै ‘बी १९००डी’ जहाज क्यानेडियन कम्पनीलाई बिक्री गरेको हो । पुरानो जहाजको नियमित मर्मत–सम्भार खर्च बढ्दै गएपछि जहाज बिक्री गर्ने निष्कर्षमा बुद्ध एयर पुगेको हो ।

अहिले बुद्धसँग तीनवटा ‘एटिआर४२–३२०’ र ११ वटा ‘एटिआर७२–५००’ जहाज रहेका छन् । एटिआर विमानबाट मात्रै उडान गर्ने निर्णयपछि उडानयोग्य अवस्थामै रहेको बिचक्राफ्ट जहाज बिक्री गरेको बुद्ध एयरका प्राविधिक निर्देशक मंगेश थापाले बताए ।

९एन–एइई कलसाइनको ‘बि१९०० डी’ जहाजले पहिलो उडान ११ अक्टोबर १९९७ मा गरेको थियो । २५ वर्षअघि ४.५ मिलियन डलरमा खरिद गरेका जहाज क्यानेडियन कम्पनीलाई राम्रै मूल्यमा बिक्री गरेको कम्पनीको भनाइ छ ।

बुद्धका बिचक्राफ्ट ९एन–एइई जहाज १५ सेप्टेम्बर १९९७ र ९एन–एइडब्लू १८ सेप्टेम्बर १९९८ मा उत्पादन भएका हुन् । करिब ७५ हजार साइकल पूरा गरेका दुईवटै जहाज क्यानेडियन कम्पनीले खरिद गरेको हो । एक ठाउँबाट उडेर अर्को ठाउँमा अवतरण गरेपछि जहाजको एक साइकल पूरा हुन्छ ।