४७ दलले बुझाए निर्वाचन खर्च विवरण, धेरै खर्च गर्नेमा नेकपा एस र राप्रपा

१० माघ, काठमाडौं । गत मंसिर ४ मा सम्पन्न भएको प्रतिनिधिसभा सदस्य निर्वाचनका लागि बन्दसूची बुझाएका ४७ दलले निर्वाचन आयोगमा निर्वाचन खर्च विवरण बुझाएका छन् । राजनीतिक दलहरूले समानुपातिक निर्वाचन प्रणालीतर्फ भएको प्रचारप्रसारको खर्च विवरण आयोगमा बुझाएका हुन् । निर्वाचन आयोगले दलहरूले गर्न पाउने खर्चको सीमा तोकेर विवरण बुझाउन भनेको थियो ।

आयोगमा बुझाइएको विवरणानुसार नेकपा एकीकृत समाजवादी राष्ट्रिय प्रजातन्त्र पार्टीले सबैभन्दा बढी खर्च गरेका छन् । धरै खर्च गरेपनि एकीकृत समाजवादी समानुपातिकतर्फ चोरै मतले राष्ट्रिय दल बन्न सकेन । उनले पाँच हजारभन्दा बढी मत ल्याउन सकेको भए राष्ट्रिय दल बनेर कम्तिमा पाँच सांसद लिने थियो । एकीकृत समाजवादीले एक करोड ९० लाख ८९ हजार ५०० रुपैयाँ खर्च भएको विवरण आयोगमा बुझाएको छ ।

ओयोगका अनुसार राष्ट्रिय प्रजातन्त्र पार्टी (राप्रपा) बढी खर्च गर्ने दोस्रो दलमा परेको छ उसले एक करोड ८९ लाख खर्च भएको विवरण आयोगलाई दिएको छ । निर्वाचनमा सबैभन्दा ठूलो दल बनेको नेपाली कांग्रेसले एक करोड ५५ लाख ३२ हजार ५७८ खर्च भएको विवरण आयोगमा पेस गरेको छ भने नेकपा एमालेले एक करोड ३३ लाख २६ हजार ६९३ खर्च गरिएको विवरण बुझाएको छ । एमाले धेरै गर्चगर्ने दलको चौथो नम्बरमा परेको छ ।

नेकपा माओवादी केन्द्रले एक करोड चार लाख ३४६ रुपैयाँ खर्च भएको विवरण पेस गरेको छ । माओवादी र डा. बाबुराम भट्टराई नेतृत्वको नेपाल समाजवादी पार्टी (नेसपा) एकल चुनाव चिह्न लिएर निर्वाचनमा होमिएका थिए । निर्वाचनमा पहिलोपटक प्रतिस्पर्धा गरेको राष्ट्रिय स्वतन्त्र पार्टीले ३६ लाख ८६ हजार २२५ रुपैयाँ खर्च गरेको जनाएको छ ।

आयोगमा बुझाइएको विवरणानुसार जनता समाजवादी पार्टी (जसपा) ले ३५ लाख खर्च गरेको छ । जनमत पार्टीले तीन लाख ८८ हजार खर्च गरेको छ । बहुजन शक्ति पार्टीले समानुपातिक निर्वाचनको प्रचारप्रसारका लागि खर्च नै नभएको जनाएको छ । उक्त निर्वाचनबाट सात पार्टी राष्ट्रिय दल बनेका थिए भने १२ दल संसदमा रहेका छन् ।