प्रचण्डको आग्रहमा कांग्रेसले समर्थन दिएको होः प्रवक्ता महत

१२ माघ, बाँके । नेपाली कांग्रेसका प्रवक्ता डा प्रकाशशरण महतले प्रधानमन्त्री पुष्पकमल दाहल प्रचण्डको आग्रहमा राष्ट्रिय सहमतिका लागि कांग्रेसले सरकारलाई समर्थन गरेको बताएका छन् । उनले प्रत्रानमन्त्रीले राष्ट्रिय सहमति चाहेको हो किब होइर्न भन्ने कुरा केही समयपछि नै जानकारी हुने बताएका छन् । राष्ट्रिय सहमतिको परिक्षामा प्रचण्ड उत्रिण हुनेनहुने राष्ट्रपतिको निर्वाचनमा देखिने उनको भनाइ छ ।

नेपाल प्रेस युनियन, बाँकेले बिहीबार आयोजना गरेको पत्रकार भेटघाटमा महतले प्रधानमन्त्रीको आग्रहमा राष्ट्रिय सहमतिका लागि कांग्रेसले पनि सरकारलाई विश्वासको मत दिएको हो तर कांग्रेस सरकारमा भने नजाने बताए । सभामुख, राष्ट्रपति आदि निर्वाचनमा राष्ट्रिय सहमति होस् भनेर नै कांग्रेसले सरकारको समर्थन गरेको हो र यसको नतिजा आउन बाँकीरहेको प्रवक्ता महतले बताए ।

उनले संसदमा गुण र दोषका आधारमा सशक्त प्रतिपक्षको भूमिका निर्वाह गर्ने भन्दै सरकारलाई समर्थन गर्नुको अर्थ मन्त्रिपरिषदमा सहभागी हुनु नरहेको बताए । प्रधानमन्त्री प्रचण्डले संविधान रक्षाका लागि उभिनका लागि र समझदारी निर्माण गर्छु भन्ने मनसाय राखेको र समझदारी विकास गर्ने भनेकाले उनको त्यो प्रतिबद्धताको परीक्षण गर्न पनि कांग्रेसले सरकारलाई समर्थन गरेको महतले बताए ।

संविधान रक्षाको जिम्मेवारी राष्ट्रिपतिको पनि भएकाले त्यसमा कांग्रेसको दाबी रहेको उल्लेख गर्दै उनले पार्टीले विगतमा प्रधानमन्त्रीमा नेतृत्व दाबी गर्दा गठबन्धन विभाजन हुने उद्देश्य नरहेको र केही राजनीतिक मूल्याङ्कनमा त्रुटि भएकाले गठबन्धन भत्केको बताए ।

प्रवक्ता महतले राष्ट्रपतिमा कांग्रेसको दाबी रहेको तर कांग्रेस सभापति शेरबहादुर देउवा राष्ट्रपतिको उम्मेदवार नभएको पनि स्पष्ट गरे । उनले राष्ट्रपतिका लागि पार्टीका वरिष्ठ नेता रामचन्द्र पौडेललगायतका नेता इच्छुक रहेकाले उपयुक्त समयमा पार्टीले निर्णय गर्ने पनि बताए ।