राष्ट्रपतिको भूमिकाबारे पूर्वप्रधान्यायाधीशको यस्तो टिप्पणी !

१२ माघ, काठमाडौं । राष्ट्रपति विद्यादेवी भण्डारीको भूमिका र उनको सवारीबाट सर्वसाधारणमा परेको असरबारे पूर्वप्रधानन्यायाधीश शुशिला कार्कीले आक्रोशपूर्ण टिप्पणी गरेकी छन् । वसन्त श्रवणका लागि बिहीबार भएको सवारीमा कार्की परेपछि उनले कार्यकारी राजाभन्दा जनताको राष्ट्रपतिको शान र रवाफ ठूलो भएको बताएकी छन् । उनले जनताको छोराछोरी भएर पनि राष्ट्रपतिले राजाको भन्दा चर्को सम्मान खाजेको बताएकी छन् ।

बिहीबार काठमाडौंमा आयोजित आम निर्वाचन २०२२ को मिडिया अनुगमन प्रतिवेदनसम्बन्धी राष्ट्रिय कार्यशाला गोष्ठीमा भाग लिन निस्किएकी कार्की राष्ट्रपतिको सवारी जाममा परेपछि निर्धारित समयभन्दा ढिला उपस्थित भएकी थिएन । उनले राष्ट्रपतिको सवारीले गर्दा आफुले बाटोसम्म नपाएको गुनासो गरिन् । उनले राष्ट्रपति भण्डारी राजा जस्तै भएको टिप्पणी गर्दै उनको सवारीका कारण आफूले पाएको दुःख व्यक्तिगत नभएको बताइन् ।

पूर्वप्रधानन्यायाधीशको हैसियतमा रहेकाहरुलाई त यस्तो समस्या पर्छ भने अरु सर्वसाधारणको मनस्थितिमा राष्ट्रपतिको कार्यप्रति कस्तो प्रभाव पर्ला भन्ने आशय उनको थियो । उनले यस्ता सवारीलाई व्यवस्थित बनाउन सकिने धेरै उपाए भएपनि त्यसो नगरिएको भन्दै कार्यक्रममा आफू लामो बाटो र घुमेर आउनुपरेको बताइन् । उनले राजाले ठिक गरेनन् भनेर आउने मान्छेहरु पनि राजा जस्तै भएको टिप्पणी गरिन् ।

पूर्वप्रधानन्यायाधीश कार्कीले पुराना प्रतिनिधिहरुको मानसिक विकास हुन नसकेको भन्दै गत निर्वाचनबाट युवाहरु आउनु सकारात्मक भएको बताइन् । राम्रो व्यक्तिहरुलाई प्रतिनिधि बनाउन सकिएमा मुलुकले राम्रो बाटो पाउने उनले बताइन् । उनले भनिन्,‘यस वर्षको निर्वाचनबाट के देखिएको छ भने हाम्रो नातिनी उमेरकाहरु अहिले देखा परे । थोरै रुपमा मुठीभरमा थोरै युवा र युवतीहरु देखा परेका छन् अहिले । त्यो प्रयास भएको छ ।’

कार्कीले पुराना प्रतिनिधिहरुको मानसिक विकास हुन नसकेकोका कारण राष्ट्रपतिबाट आफुले पनि दुःख पाएको बताउँदै भनिन्,‘त्यहीँको यहीँ आउनुछ । बाटो छैन । कताबाट जान पाइने हो त्यो पनि भनिदैन । कहाँबाट म आउनुपर्ने, सर्टकट नजिकमा आउनुपर्ने धेरै घुमेर आएको हुँ म । राजाले ठिक गरेनन् भनेर नयाँ व्यवस्थाका लागि लडियो तर, आउने मान्छेहरु राजैजस्तो भए । यो मानसिकता भएकालाई हटाउन भनेको चुनावले हो, अब अति भयो ।’

उनले गत निर्वाचन शान्तिपूर्णरुपमा भएको भन्दै निर्वाचनबाट पुरानो मानसिकताहरु फिल्टर हुँदै गएको र नयाँ सोचाइ भएका कर्मठ युवा, युवतीहरु आगामी दिनमा अझ आउनुपर्ने बताइन् । आउने निर्वाचनमा पुरानो मानसिकता बोकेकाहरुलाई तलैबाट पराजित गर्नुपर्ने उनको भनाइ छ । लोकतन्त्रमा निर्वाचन नै सबैभन्दा उत्तम विकल्प भएको काकीको भनाइ छ । कार्यक्रम प्रेस काउन्सिल नेपाल, कानुन समाज लगायतका संस्थाहरुले आयोजना गरेका थिए ।