उपरथी शाही जंगीअड्डामा २४ दिनदेखि थुनामा

१३ माघ, काठमाडौं । प्रेम शाही उपरथीमा बढुवा भएपछि दर्ज्यान्ही चिह्न लगाइदिँदै तत्कालीन प्रधान सेनापति पूर्णचन्द्र थापा । फाइल तस्वीर

नेपाली सेनाका उपरथी प्रेम शाही झण्डै एक महिनादेखि नेपाली सेनाको मुख्यालय जंगीअड्डाभित्रै सैनिक हिरासतमा थुनामा छन् । उनलाई आफन्तहरुसँग सहज भेट दिइएको छैन । उनको कसुरबारे वहालवाला र पूर्वसैनिक अधिकारीहरुले बोलेका छैनन् ।

सैनिक प्रवक्ता कृष्णप्रसाद भण्डारीले शाहीविरुद्ध ‘आर्थिक सुशासन उल्लंघन’बारे छानबिन भइरहेको कुरा मात्र बाहिर ल्याइरहेका छन् । शाही सेवाबाट अवकाश दिने संगठनको निर्णय गलत भएको जनाउँदै सर्वोच्च अदालतबाट निर्णय रोक लगाउने आदेश लिएर जंगी अड्डामा पुनः हाजिरीका दागि जाने क्रममा सैनिक प्रहरीले हिरासतमा लिएका थिए ।

सैनिक अदालत नियमावली, २०६४ अनुसार ‘कोर्ट अफ इन्क्वायरी’ले यथाशिघ्र अनुसन्धान गरेर सबूत प्रमाण संकलन गरेर रायसहितको प्रतिवेदन प्राड विवाकको कार्यालयलाई दिनुपर्ने व्यवस्था छ ।

जंगी अड्डा र रक्षा मन्त्रालयले आफ्नो सेवाको उमेरहद एक वर्ष छोट्याएको आरोपमा सर्वोच्च पुगेका थिए । सर्वोच्चले उनको रिट निवेदनको पक्षमा फैसला गरेपछि उनी पुनः सेवा फर्किन जंगी अड्डा पुगेका थिए ।