गृह मन्त्रालय आफैसँग राख्ने प्रधानमन्त्रीको तयारी, मन्त्रिपरिषदमा हेरफेर हुँदै

१४ माघ, काठमाडौँ । रवि लामिछाने पदमुक्त भएपछि रिक्त रहेको गृह मन्त्रालयलाई लिएर सत्ता गठबन्धनमा रस्साकस्सी सुरु भएको छ । प्रधानमन्त्री भएपनि महत्वपूर्ण मन्त्रालय नपाएको भन्दै गृहमन्त्रालयमा माओवादीले दावी गरेको छ । यसबारे प्रधानमन्त्री पुष्पकमल दाहाल प्रचण्ड र नेकपा एमालेका अध्यक्ष केपी ओलीबीच छलफल हुँदैछ । दुई नेतामा सहमति भएपछि सत्ता गठबन्धनमा मन्त्रिपरिषदमा जिम्मेवारी हेरफेर गर्ने वा माओवादीलाई सो मन्त्रालय दिने भन्ने निर्णय हुनेछ ।

माओवादीका एक नेताले नेपालबहससँग भने, ‘प्रधानमन्त्री जुन दलको हो उसले पहिले नै गृह र अर्थमन्त्रालय राख्नुपर्ने थियो । तर, हतारमा गठबन्धन बनाउँदा अध्यक्षले प्रधानमन्त्री लिएर सहमतिका लागि अरु महत्वपूण मन्त्रालय छाड्नुभयो । पहिले भएको गल्तीलाई अब सुधार गर्ने समय आएको छ । गृहमन्त्रालय माओवादीले राख्छ , छोड्नै पर्ने अवस्था आए हामी अर्को मन्त्रालय छोड्छौँ ।’

अहिले प्रधानमन्त्री प्रचण्डले गृह मन्त्रालय आफैंसँग राखेका छन् । सर्वोच्च अदालतले उपप्रधान तथा गृहमन्त्री रवि लामिछानेको सांसद पद खारेज गरेपछि उनी पदमुक्त भएपछि अर्को निर्णय नभएसम्म उक्त मन्त्रालयको जिम्मेवारी आफैले लिएका हुन् । ती नेताले भने ‘प्रधानमन्त्रीसँग गृह मन्त्रालय राख्दा सजिलो हुन्छ भन्ने सुझाव आएको छ । यसबारे प्रधानमन्त्री र अध्यक्ष ओलीबीच शनिबार छलफल हुनेछ ।’

प्रधानमन्त्री नियुक्त भएपछि दाहालले गृह मन्त्रालय आफैंसँग राख्ने चाहना हुँदाहुँदै गठबन्धन दलबीच भागबन्डा मिलाउन लामिछानेलाई गृहमन्त्री नियुक्त गरेका थिए । शक्तिशाली मन्त्रालय नराखेकामा माओवादीभित्र प्रचण्डको आलोचना भएको थियो । सुरुमै उपप्रधानसहित नारायणकाजी श्रेष्ठले गृहमन्त्रालयमा जान चाहेका थिए । तर, पनि उनले पाएनन् । अहिले पनि उनी भरसक गृहमा जान चाहिरहेका छन् । गृह लिने भएपछि माओवादी भित्र पनि उक्त मन्त्रामलयमा जान रस्साकस्सी सुरु भएको छ ।

अहिले माओवादीबाट प्रधानमन्त्रीसहित पाँच मन्त्री र एक राज्यमन्त्री छन् । राष्ट्रिय स्वतन्त्र पार्टीलाई दिनैपर्ने भए अरु मन्त्रालय दिने नत्र माओवादीबाट नै मन्त्री थप्ने तयारी छ । नागरिकता प्राप्त गरेपनि वा अर्को व्यक्तिलाई प्रस्ताव गरेपनि अब रास्वपालाई गृह नदिने रणनीतिमा माओवादी पुगेको छ । अरू नभए पनि अब गृह मन्त्रालय प्रधानमन्त्रीले राख्नुपर्छ भन्ने मत माओवादीमा छ ।