सहकारीका सञ्चालक सम्पर्कविहीन बनेपछि विभाग गुहार्दै पीडित

१५ माघ, काठमाडौं । नयाँबानेश्वरमा मुख्य कार्यालय रहेको सन्ध्या बचत तथा ऋण सहकारीका संचालकहरु बचतकर्ताको सम्पर्कबाट टाढिएका छन् ।

पुसको तेस्रो सातादेखि बचतकर्तालाई २ हजार रूपैयाँ पनि फिर्ता गर्न नसक्ने स्थिति आएपछि उनीहरु सम्पर्कबाट टाढा भएका हुन् ।

सहकारीले पुस २१ गतेबाट बचतकर्तालाई एक पटकमा जम्मा तीन हजार रूपैयाँसम्म मात्र दिन सकिने भनेको थियो । यसपछि दैनिक १५ जनाभन्दा बढी बचतकर्ता आउन थालेपछि आइतबार संस्थाको मुख्य कार्यालय बन्द गरिएको छ ।

बचत फिर्ता माग्न गएका पीडितहरू कार्यालय नै बन्द भएको पाइएपछि सञ्चालक फरार भएको भन्दै सहकारी विभाग गुहार्न पुगेका छन् । उनीहरूले संचालकविरूद्ध विभागमा उजुरी दिएका छन् ।

संचालकमध्ये एक मनबहादुर राईले फेकबुक पेजसमेत निष्क्रिय राखेर फोन नउठाइरहेको पीडितहरुले बताएका छन् ।
बचत फिर्ता नपाएर रित्तो हात फिर्ता हुनु परेको बचतकर्ताहरुले बताएका छन् ।

संस्थामा एकै व्यक्तिको लाखौं रुपैयाँसम्म बचत रहेको बताइएको छ । संस्थाका अध्यक्ष प्रदीप बराल हुन् ।