बाबुले पेट्रोल छर्केर आगो लगाउँदा २ वर्षे छोराको मृत्यु

१६ माघ, नेपालगन्ज । बाँकेको कोहलपुर नगरपालिका–२ शक्तिनगरमा बाबुले पेट्रोल छर्केर लगाएको आगोमा जलेर २ वर्षे छोराको मृत्यु भएको छ । बालकका आमा गम्भीर घाइते भएकी छन् ।

प्रहरीका अनुसार स्थानीय ३० वर्षीय भानुभक्त विकले आइतबार अपराह्न पाँच बजेतिर श्रीमती गंगा र छोरा प्रिन्सलाई पेट्रोल छर्किएर आगो लगाएका थिए ।

आगोमा परी छोरा प्रिन्सको ज्यान गएको छ भने श्रीमती गगां विक घाइते भएकी छन् । कम्मरभन्दा माथिको भाग जलेको बालकको उपचारका क्रममा भेरी अस्पतालमा मृत्यु भएको प्रहरीले जनाएको छ ।

घटनापछि भारततर्फ भागेका उनलाई प्रहरीले गएराति साढे १ बजेतिर भारतीय क्षेत्र नानापाराबाट पक्राउ गरी अनुसन्धान अगाडि बढाएको छ ।

श्रीमती गंगाको पनि घाँटी, हात, कान लगायतका शरीरको करिब २० प्रतिशत भाग जलेको छ ।