नेताहरूको कार्यविभाजनले माओवादीमा तनाव, सर्यो स्थायी कमिटी बैठक

१६ माघ, काठमाडौं । सत्ता नेतृत्व गरिरहेको नेकपा माओवादी केन्द्र नेताहरुको पद विभाजन चुनौतिपूण बन्दै गएको छ । पद विभाजन नमिलेका कारण स्थगित भएको स्थायी कमिटी बैठक पनि तीनदिन पर सारिएको छ । यसअघि नेताहरूको कार्यविभाजन मिलाउन भन्दै स्थायी कमिटी बैठक भोलीसम्म सारिएको थियो । सोमबार बसेको पदाधिकारी बंठकले उक्त बैठक १८ गतेसम्म सारेको छ ।

माओवादीको पार्टी केन्द्रीय कार्यालय पेरिसडाँडामा सोमबार बोलाइएको पदाधिकारी बैठकमा नेताहरुको कार्य विभाजनको विषयमा कुरा नमिलेपछि माघ १७ गतेका लागि सारिएको स्थायी कमिटी बैठक फेरी १८ गतेका लागि बोलाउने निर्णय गरिएको उपाध्यक्ष कृष्णबहादुर महराले नेपालबहसलाई बताए ।

पार्टीको संगठनसम्बन्धी होमवर्क नसकिएकाले भोलि पनि पदाधिकारी बैठक बसेर आवश्यक निर्णय गरी स्थायी समिति बैठक पर्सिका लागि सार्ने निर्णय गरिएको उनको भनाइ छ । आज र भोलि होमवर्क गर्ने पर्सि स्थायी कमिटी बैठक बस्ने निर्णय भएको उनले बताए । उनले पदाधिकारी बैठक त्यही होमवर्ककै विषयमा केन्द्रित भएपनि सहमति जुटन नसकेको बताए ।

आज संगठनसम्बन्धी विषयमा मात्रै छलफल भएको थियो । माओवादी केन्द्रको स्थायी कमिटी बैठकमा पेस गर्ने नेताहरुको कार्य विभाजनसम्बन्धी प्रस्ताव तयार पार्न महासचिव देवप्रसाद गुरुङ नेतृत्वको कार्यदल बनाएको थियो । त्यसमा सहमति जुटाउन आज पदाधिकारी बैठक बोलाइएको थियो । तर, सहमति जुटेन् ।

पदाधिकारी बैठकले सो विषयमा टुंगो लगाउन नसक्ने भएपछि भोलि बोलाइएको स्थायी समिति बैठक पर्सिसम्मका लागि स्थगित गरिएको हो । बैठकमा गृहमन्त्री कसलाई बनाउने भन्ने विषयमा समान्यमात्र छलफल भएको थियो । प्रधानमन्त्री पुष्पकमल दाहाल प्रचण्डले गृहमन्त्रीकाबारे खासै चर्चा नगरेको बताइएको छ ।