आत्मदाह घटनामा उच्चस्तरीय न्यायिक छानबिन समिति गठन गुर्नुपर्छः सांसद सिंह

काठमाडौं, १८ माघ । देशभर आत्मदाह तथा आत्महत्याको घटना बढेको भन्दै उच्चस्तरीय न्यायिकको छानबिनको माग गरिएको छ ।

प्रतिनिधिसभाको बुधबार बसेको बैठकमा सांसद अमरेशकुमार सिंहले देशभर आत्मदाह र आत्महत्याको घटना बढेकाले यसको उच्चस्तरीय न्यायिक छानबिन गर्नुपर्ने माग गरेका हुन् ।

प्रेमप्रसाद आचार्यले जस्तै देशभर आत्मदाह र आत्महत्याको घटना बढेको भन्दै उनले किन जनता आत्मदाह र आत्महत्या गर्ने अवस्थामा पुगे भन्ने विषयमा उच्चस्तरीय न्यायिक छानबिन गर्र्नुपर्ने माग गरेका हुन् ।

अघिल्लो साताको मंगलबार प्रधानमन्त्री पुष्पकमल दाहाल ‘प्रचण्ड’ संघीय संसद भवनबाट बाहिर निस्कँदै गर्दा गेटमा आत्मदाह गरेका इलामका प्रेमप्रसाद आचार्यको भोलिपल्ट बुधबार उपचारका क्रममा कीर्तिपुरस्थित बर्न अस्पतालमा निधन भएको थियो ।

आत्मदाहका लागि उनले आफ्नो शरीरमा पेट्रोल छर्केर आगो लगाएका थिए । आगोले जलेर उनी सडकमै बेहोस भएकामा उद्धार गरी अस्पताल पर्याइएको थियो ।