सरकारलाई गगन थापाको प्रश्नः ‘ऋणले थिचिएका किसान आत्मदाहकाे बाटाेमा नपुगेसम्म कुर्ने हो ?’

१८ माघ, काठमाडौं । नेपाली कांग्रेसका महामन्त्री गगनकुमार थापाले बर्ड फ्लु नियन्त्रण गर्न कुखुरा नष्ट गरिएका साना किसानलाई क्षतिपूर्ति छिटो दिन सरकारसँग माग गरेका छन् ।

बुधबार प्रतिनिधि सभाको शून्य समयमा बोल्दै महामन्त्री थापाले बैंकको ऋण तिर्न नसकेर मर्कामा परेका किसानको समस्या बेलैमा बुझ्न सरकारलाई आग्रह गरे । उनले बर्डफ्लु नियन्त्रणका लागि कुखुरा नष्ट गरिएका किसानलाई सरकारले दिनुपर्ने ५८ करोड रुपैयाँ क्षतिपूर्ति दिन बाँकी रहेको भन्दै उक्त रकम दिन ढिलाइ नगर्न आग्रह गरेका छन् ।

सरकारले कृषकलाई झुलाउने र गलाएर आत्मदाहको स्थितिमा पुर्याउन खोजेको आरोप लगाए । ‘बैंकको ऋणले थिचिएका किसानहरुले कुनै अप्रिय निर्णय नलिएसम्म कुर्ने हो ?’ उनले सरकारलाई प्रश्न गरे, ‘सरकारको काम किसानले अप्रिय निर्णय गरेपछि आँसु झार्दै छानबिन गर्न समिति मात्र बनाउने हो ?’