प्रेस चौतारीले ६ जना पत्रकारलाई पुरस्कृत गर्ने

१८ माघ, काठमाडौं । एमाले निकट प्रेस चौतारी नेपालले ६ जना पत्रकारलाई पुरस्कृत गर्ने भएको छ । चौतारीले आफ्नो स्थापना दिवसका दिन माघ २२ गते हृदयचन्द्र सिंह प्रधानसहित ६ वटा पुरस्कार प्रदान गर्दै आएको छ । उसले यस बर्ष प्रदान गर्ने पुरस्कारका लागि आज नाम सार्वजनिक गरेको छ ।

संगठनको सचिवालय बैठकले वरिष्ठ पत्रकार तथा प्रेस स्वतन्त्रता सेनानी रघु मैनालीको संयोजकत्वमा गठन गरेको पुरस्कार छनोट समितिले यस वर्षको हृदयचन्द्रसिंह प्रधान पत्रकारिता पुरस्कारबाट चौतारीका पूर्वअध्यक्ष डा बालकृष्ण चापागाईं पुरस्कृत गर्ने निर्णय गरेको छ ।

यस्तै यस बर्षको अग्नि शिखा स्मृति पत्रकारिता पुरस्कारबाट लमजुङका पत्रकार कृष्ण केसीलाई पुरस्कृत गर्ने निर्णय गरेको छ । डेकेन्द्र थापा स्मृति पत्रकारिता पुरस्कारबाट दैलेखका याम शर्मा, बीरेन्द्रकुमार साह क्रियाशील पत्रकारिता पुरस्कारबाट बाराका लक्ष्मी साहलाई पुरस्कृत गर्ने निर्णय गरेको छ ।

यस्तै, सावित्री–पद्मलक्ष्मी बस्नेत स्मृति पत्रकारिता पुरस्कारबाट सुनसरीका लीलाराज भट्टराई र चन्द्र न्यौपाने–शान्तिराम कार्की स्मृति पत्रकारिता पुरस्कारबाट डडेलधुराकी ममता भट्टलाई पुरस्कृत गर्ने निर्णय भएको छ ।

प्रेस चौतारीको यही माघ ९ र १० गते बसेको सचिवालय बैठकले बरिष्ठ पत्रकार मैनाली संयोजक तथा उपाध्यक्ष देविका जिएम र महासचिव हिरामान लामा सदस्य रहेको पुरस्कार छनोट समिति गठन गरेको थियो । समितिले तयार पारेको प्रतिवेदनका आधारमा पुरस्कृत हुने पत्रकारहरुको नाम केन्द्रीय समितिले टुंगो लगाएको जनाइएकाे छ ।