बागलुङमा एक व्यवसायीले गरे शरीरमा पेट्रोल छर्केर आत्मदाहको प्रयास

१८ माघ, पोखरा । बागलुङमा एक जना पुरुषले घरभित्रै आत्मदाहको प्रयास गरेका छन् । बागलुङ नगरपालिक–८ सिगानाका ५३ वर्षीय शेरबहादुर जिसीले बुधबार आफ्नै शरीरमा पेट्रोल छर्केर आत्मदाहको प्रयास गरेको जिल्ला प्रहरी कार्यालय बागलुङले जनाएको छ ।

आगोमा जलेर गम्भीर घाइते जिसीलाई थप उपचारका लागि पोखरा पठाइएको बाग्लुङ प्रहरीले जनाएको छ । घाइते उनलाई सुरुमा धौलागिरी अस्पतालमा उपचारपछि गरिएको थियो ।

व्यवसाय गर्दै आइरहेका जिसीले घरमा कोही नभएको अवस्थामा जिसीले आफ्नो शरीरमा पेट्रोल छर्केर शरीरमा आगो लगाएका थिए । आत्मदाहको कारण नखुलेको तथा घटनाबारे थप अनुसन्धान भइरहेको प्रहरीले जनाएको छ ।

यसअघि याही माघ १० गते नयाँ बानेश्वरस्थित संसद भवनअगाडि व्यवसायी प्रेमप्रसाद आचार्यले आफ्नै शरीरमा पेट्रोल छर्केर आगो लगाएका थिए । उपचारका क्रममा उनको मृत्यु भएको थियो । उनको मृत्युबारे बुधबार संसद बैठकमा सांसदहरुले घटनाको छानबिन गरी कारण पत्ता लगाउन न्यायिक आयोग गठन गर्न सरकारसँग माग गरेका छन् ।