संघीयताविरुद्ध बोल्ने मन्त्रीलाई बर्खास्त गर्न जसपाको माग

१८ माघ, काठमाडौं । संघीयता, धर्म निरपेक्षता र गणतन्त्रविरुद्ध बोल्ने मन्त्रीलाई बर्खास्त गर्न सरकारसँग माग गरेका छन् । बुधबार संसदको बैठकमा बोल्दै जनता समाजवादी पार्टी (जसपा)का सांसद राजकिशोर यादवले गणतन्त्र र संघीयताविरुद्ध अभिव्यक्ति दिने राष्ट्रिय प्रजातन्त्र पार्टीका मन्त्रीहरुलाई कारबाही गर्न माग गरेका छन् ।

संविधानविरुद्ध बोलिरहे आफूहरू सदन घेर्ने बाध्य हुने चेतावनी समेत दिए । उनले यसअघि राष्ट्रियसभामा उठेका प्रश्नको जवाफ दिने क्रममा प्रधानमन्त्री प्रचण्डले गणतन्त्र र संघीयताविरुद्ध बोल्ने मन्त्रीहरुलााई स्पष्टिकरण सोधेर कारबाही प्रक्रिया अगाडि बढाउने भनी दिएको विषय कहाँ पुग्यो भन्नै प्रश्न गरे ।

‘प्रधानमन्त्री जीले मन्त्रीहरुलाई स्पष्टीकरण सोध्छु भन्नुभएको थियो । त्यो के भयो ? यदि यही रवैया रह्यो भने हामी सदन घेर्न बाध्य हुन्छौं होइन भने यस्ता अनुशासनहीन र संविधान नमान्ने मन्त्रीलाई बर्खास्त गर्न गर्नुपर्छ’ सांसद यादवले भने ।

उनले संघीयता कसैको कृपाले, गणतन्त्र कसैको आशीर्वाद र दाइजोबाट नआएको बताउँदै जनताको त्याग र बलिदानबाट सामन्ती राजतन्त्र फालेर गणतन्त्र ल्याएको बताए । मुलुक गणतन्त्र र संघीयतााबाट पछाडि फर्कन नसक्ने भनाइ उनको यियो ।