आजको बैठकमा अनिवार्य उपस्थित हुन मन्त्रीहरुलाई रास्वपाको निर्देशन

१९ माघ, काठमाडौं । राष्ट्रिय स्वतन्त्र पार्टीको बैठक आज बस्ने बैठकमा अनिवार्य उपस्थित हुन आफ्ना मन्त्रीहरुलाई निर्देशन दिएको छ । आज अपरान्ह साढे ४ बजे पाटीर्को केन्द्रीय समिति र संसदीय दलको संयुक्त बैठक पार्टी कार्यालयमा बस्दैछ ।

उक्त बैठकमा मन्त्रीहरुलाई अनिवार्य उपस्थित हुन पार्टी सभापतिबाट निर्देशन भएको सदस्य दीपक बोहराले बताए । बैठकमा पार्टी सरकारमा बस्ने या बाहिरिने भन्ने विषयमा निर्णय हुने स्रोतले बतायो । सर्वोच्च अदालतको ओदशले सभापति रबि लामिछाने सांसद पद गृहमन्त्रीबाट च्युत भएपछि रास्वपाले गृह मन्त्रालय गुमाएको छ ।

सर्वोच्चकै आदेशमा लामिछानेले नेपाली नागरिकता लिइसकेका छन् । तर प्रधामन्त्रीले प्रचण्डले गृह आफैंसँग राखेका छन् । रास्वपाले भने गृह मन्त्रालय आफूले पाउनुपर्ने अडान छाडेको छैन ।

रास्वपाबाट हाल श्रम, रोजगार तथा सामाजिक सुरक्षामन्त्री डोलप्रसाद अर्याल, शिक्षामन्त्री शिशिर खनाल र स्वास्थ्य राज्यमन्त्री डा. तोसिमा कार्की छन् । गृह पाउन लामिछाने पछिल्लो चरणमा निकै दौडधुप गरिरहेका छन् । तैपनि गृहबारे प्रधानमन्त्रीले निर्णय लिइसकेका छैनन् । गृह नपाए सरकार छाड्ने अभिव्यक्ति सभापति लामिछानेले दिँदै आएका छन् ।