विदेशी तरकारी आयात रोक्न माग गर्दै सडकमा तरकारी फ्याँकेर आन्दोलनमा उत्रिए किसान

२० माघ, चितवन । स्वदेशी तरकारीले उत्पादन अनुसारको लागत नपाएको र विदेशीबाट तरकारी आयात रोक्न माग गर्दै चितवनका तरकारी उत्पादक किसानले नारायणगढको पुल्चोकमा विरोध प्रदर्शन गरेका छन् । उनीहरुले ट्रयाक्टरबाट तरकार सडकमा पोखाएर ट्रकले किच्न लगाएर विरोध गरे ।

उनीहरुले भारतीय तरकारीको जथाभावी आयातले स्वदेशी तरकारी उत्पादक किसानले लागत मूल्य समेत नपाएको भन्दै भन्दै नारायणगढ गोलभेडा, काउली, बन्दा, परबल, काँक्रो लगायतका तरकारी सडकमा फ्याँकेर सरकारविरुद्ध चर्का नारा लगाए ।

विदेशी तरकारी दलाल मूर्दावाद, स्वदेशी तरकारीलाई बजार दे, हाम्रो माग पूरा गर’ जस्ता नारा लगाएका थिए । ‘किसान आन्दोलन’ नाम दिइएको प्रदर्शनमा सयौं महिला, पुरुष किसानहरु सहभागी थिए । भारतबाट सरकारले सस्तोमा तरकारी खरिद जारी राखेपछि नेपाली किसानहरुले बैंकबाट ऋण निकालेर उत्पादन गरेको तरकारीले बजारबाट लागत समेत उठाउन नसकिरहेको उनीहरुको गुनासो छ ।

उनीहरुले ‘किसानहरुले बारीमा जाउँ भविष्य छैन, खाडीमा जाउँ उमेर छैन, नेपाली किसान मार्न पाइँदैन, विदेशी तरकारी र फलफूल चाहिंदैन’ प्लेकार्ड र ब्यानर प्रदर्शन गरेका थिए ।

प्रदर्शनका कारणले केहीबेर राजमार्गमा सवारी साधन आवागमन नै बन्द भएको थियो । आफूहरुको माग सुनुवाइ नभएमा थप सशक्त आन्दोलन संचालन गर्ने चितावती समेत किसानहरुले दिएका छन् ।