एकीकृत समाजवादीको केन्द्रीय कमिटीको पूर्ण बैठक

२२ माघ, काठमाडौं । नेकपा (एकीकृत समाजवादी)को पाँचौँ केन्द्रीय कमिटीको पूर्ण बैठक जारी छ । दोस्रो दिनको बैठक आइतबार बिहान ८ बजे सुरु भएको थियो ।

विकसित राजनीतिक परिस्थिति एवं अन्तर्राष्ट्रिय घटनाक्रमका सन्दर्भमा बैठकमा नेताहरूले धारणा राख्ने क्रम चलिरहेको एक नेताले बताए । नेताहरुले वर्तमान सरकारमा सहभागी साझेदार दलहरुबीच विश्वासको संकट पैदा भएको र सरकार जतिबेला पनि ढल्न सक्ने धारणा राखेको एक नेताले बताए ।

पार्टी अध्यक्ष माधवकुमार नेपालले प्रस्तुत गरेको राजनीतिक प्रतिवेदनमा छलफलका लागि १० समूह बनाइएको छ । उक्त समूहका टोलीका नेताहरूमा अशेष घिमिरे, कृष्णकुमारी विश्वकर्मा, जीवनराम श्रेष्ठ, नरेश शाही, मोहन गौतम, राजेन्द्र लोहनी, विजय गुरुङ, सोमप्रसाद पाण्डेय, हस्त शाही तथा पूर्णा जोशी रहेका छन् ।

प्रतिवेदन प्रस्तुत गर्ने क्रममा अध्यक्ष नेपालले नेकपा (माओवादी केन्द्र)का अध्यक्ष प्रचण्ड नेतृत्वको सरकारमा आवद्ध दलहरुबीच खटपट सुरु भइसकेको र यस्तो अवस्थामा पार्टीले वैकल्पिक सरकार गठनबारे पार्टीले सशक्त भूमिका खेल्नुपर्ने बताएका थिए ।