थारु समूदायमाथिकाे दमन बन्द गर्न कांग्रेस सांसदको माग

२२ माघ, काठमाडौं । नेपाली कांग्रेसले थारु समुदायमाथि दमन नगर्न सरकारसँग माग गरेका छन् । प्रतिनिधिसभाको आइतबारको बैठकमा शून्य समयमा बोल्दै कांग्रेस सांसद तेजुलाल चौधरीले जातिय आधारमा सरकारले थारुहरूको भावनामाथि दमन गरिरहेको भन्दै आपत्ति जनाए । सांसद चौधरीले टिकापुर घटनामा दोषी ठहरिएका सम्पूर्ण थारुहरूको रिहाइको माग गरे ।

टिकापुर घटना अपराधिक नभएको जिकिर गर्दै सांसद चौधरीले भने, ‘हामीले बसमा गुडिरहेका ५० औं यात्रीलाई बमले उडाइएको घटना पनि देखका छौं । त्यस्तो घटनामा दोषीले उन्मुक्ति पाउने, अनि थारुहरूले आफ्नो पहिचानको लागि संघर्ष गर्दा उनीहरूलाई दमन गर्ने र जेलमा थुन्ने गरिएको छ, यो न्यायसंगत भएन ।’

नागरिक उन्मुक्ति पार्टीका सांसदहरूले संसद्‌मै टिकापुर घटनामा दोषी बनाइएकाहरुको तुरुन्त रिहाईको माग गर्दै आइरहेका पनि अन्य दलका सांसदले मुख खोलेको यो पहिलोपटक हो । २०७२ भदौ ७ मा भएको कैलालीको टिकापुर घटनामा नागरिक उन्मुक्ति पार्टीका संरक्षक रेशम चौधरी लगायत दर्जन बढी थारु नेताहरु जेलमा छन् भने कयौंलाई तारेखमा राखिएको छ ।