सम्पत्ति शुद्धीकरण विधेयक संसद्‌मा पेस गर्न सांसद पौडेलको माग

२२ माघ, काठमाडौं । नेपाली कांग्रेसका सांसद प्रदीप पौडेलले सरकारले सम्पत्ति शुद्धीकरणसम्बन्धी ऐनमा संशोधन गर्न बनेको विधेयक संसद्‌मा प्रस्तुत गर्न माग गरेका छन् ।

प्रतिनिधिसभाको आइतबारको बैठकमा बोल्दै सांसद पौडेलले विधेयकलाई संसद्‌मा यथाशिघ्र ल्याउनमाग गरे । विधेयक पारित गरेर नेपाललाई अन्तर्राष्ट्रिय आर्थिक सञ्जालहरूमा कालोसूचीमा पर्नबाट बचाउन संसदको दायित्व भएको उनको भनाइ छ ।

एफएटीएफको टोली नेपाललाई तत्काल यससम्बन्धी कानुन बनाएर कालो सूचीमा पर्नबाट जोगाउन सुझाव दिएको विषय समेत उनले स्मरण गराए ।

सम्पत्ति शुद्धिकरणसम्बन्धी कानून बन्न नसके आर्थिक सहयोगका हिसाबले मुलुक कालोसूचीमा पर्ने र देश आर्थिक संकटमा पर्ने उनको भनाइ छ । सरकारले बेलैमा अन्तर्राष्ट्रिय जगत्‌लाई विश्वस्त बनाउने गरी विधेयक ल्याएर कानून बनाउनु ढिलाइ गर्न नहुने उनले बताए ।