हुण्डी कारोबारीको आरोपमा न्यूरोडबाट ७८ लाख नगदसहित दुईजना पक्राउ

२२ माघ, काठमाडौं । प्रहरीले हुण्डी कारोबारीको आरोपमा काठमाडौंको न्‍यूरोड क्षेत्रबाट ७८ लाख ५० हजार रुपैयाँसहित दुईजनालाई पक्राउ गरेको छ ।

पक्राउ पर्नेमा कैलालीको गोदावरी नगरपालिका-१० घर भई हाल विजुलीबजार १० बस्‍ने ५९ वर्षीय दिपेन्द्रबहादुर मल्ल र कैलालीको धनगढी उपमहानरपालिका–९ घर भई हाल विजुली बजार बस्‍ने २३ वर्षीय किशोर चौधरी रहेका छन् ।

उनीहरुको साथबाट नेपाली नगद ७८ लाख ५० हजार, ४ लाखको चेक एक थान र संकलित रकम व्‍यवस्थापन गरेको भौचर तथा कारोबार विवरणहरु भएको मोबाइल बरामद भएको प्रहरीको दाबी छ ।

काठमाडौं न्‍यूरोड क्षेत्रमा हुण्डीको कारोबार भइरहेको सूचनाको आधारमा काठमाडौं उपत्यका अपराध महाशाखाबाट खटिएको टोलीले उनीहरुलाई पक्राउ गरेको हो । उनीहरुले दैनिक एक करोड बढीको रकम कारोबार गर्ने गरेको देखिएको प्रहरीले जनाएको छ ।

अभियुक्त दुवै जनाले विगत ४÷५ वर्षदेखि सो क्षेत्रमा अवैध धन्दा हुण्डीको कारोबार गर्दै आइरहेको प्रारम्भिक अनुसन्धानमा देखिएको प्रहरीले जनाएको छ । उनीहरुले विभिन्न व्‍यक्तिहरुबाट हुण्डीको रकम संकलन गर्ने र बैंकमा डिपोजिट गर्दै आएको खुलेको छ ।

दुवै जनालाई जिल्ला प्रहरी परिसर टेकु, काठमाडौंको हिरासतमा राखिएको छ ।