टर्की भूकम्पमा परी मृत्यु हुनेको संख्या २ सय नाघ्यो

२३ माघ, काठमाडौं । टर्कीमा सोमबार बिहानै आएको शक्तिशाली भूकम्पमा परी मृत्यु हुनेको संख्या अहिलेसम्म २ सय नाघेको छ । भूकम्पले टर्कीसहित सिरिया, लेबनान र इजरायलमा पनि क्षति पुर्‍याएको समाचार संस्था एपीले जनाएको छ। मृतकको संख्या अझै बढ्न सक्ने बताइएको छ ।

सयौं मानिसहरू घाइते भएका छन् । उनीहरुको उद्धार र उपचारको काम भइरहेको अन्तर्राष्ट्रिय संचारमाध्यमहरुले जनाएका छन् । स्थानीय समयअनुसार आज बिहान ४ बजेर १७ मिनेट जाँदा ७.८ म्याग्नेच्युडको भूकम्प गएको थियो ।

सबैभन्दा धेरै क्षति टर्की र सिरियाको सीमा क्षत्रेमा भएको छ । त्यहाँ सयौं घरहरू भत्किएका छन् । धेरै संख्यामा मानिसहरु घरहरुको भग्नावशेषमा पुरिएको जनाएका छन् । पुरिएकाहरूकाे खाेजीका लागि स्काभेटर र जेसीबी मेशिनहरूकाे प्रयाेग गरिएकाे छ ।

घरभित्र पुरिएका मानिसहरूको खोजीकार्यमा कठिनाइ भएको छ। अहिलेसम्म ४० भन्दा बढी परकम्प आइसकेको बताइएको छ। पराकम्प ६.६ म्याग्नेच्युडको रहेको जनाएका छन् ।