प्राधिकरणले चार्जिङमा अतिरिक्त शुल्क लिन नछाडेपछि विद्युतीय बस सञ्चालन बन्द

२३ माघ, काठमाडौं । सुन्दर यातायात प्रालिद्वारा संचालित विद्युतीय बस आजबाट बन्द भएको छ । बससँगै विद्युतीय चार्जिङ स्टेशन पनि बन्द गरेको प्रशासन प्रमुख रुपमा मैनालीले जानकारी दिएकी छन् ।

प्रालि र विद्युत नियमन आयोगबीच गत वर्ष भएको सम्झौता विपरीत विद्युत प्राधिकरणले अतिरिक्त रुपमा विद्युत चार्जिङ (डिमाण्ड) शुल्क लिन नछाडेपछि विरोधस्वरुप आजदेशि बस संचालन गर्न बन्द गरेको हो ।

प्राधिकरणले सम्झौताविरुछ हुने गरी विद्युतीय सवारी साधन चार्जिङ स्टेसनको नाममा लिँदै आएको अतिरिक्त डिमान्ड शुल्क नहटाएको भन्दै सुन्दर यातायातले सोमबारदेखि आफ्नो सेवा बन्द गर्ने चेतावनीसहित आइतबार विज्ञप्ति जारी गरेको थियो ।

विद्युत खपत बढाउन भन्दै सरकारले गर्दै आइरहेको आह्वान नौटंकी भएको बताउँदै यातायातले सरकारले अघोषित रुपमा विद्युतीय सवारी साधनमा रोक लगाउन गतिविधि जारी राखेको आरोप लगा एको छ । सरकारको गलत रवैया र असहयोगका कारण बस सेवा बन्द गर्न बाध्य भएको उसको दाबी छ ।