मिडिया विधेयक संसदमा लैजाने सञ्चारमन्त्री शर्माको आश्वासन

२३ माघ, काठमाडौं । सञ्चार तथा सूचना प्रविधि मन्त्री रेखा शर्माले मिडिया विधेयकलाई तत्काल अगाडि बढाउने आश्वासन दिएकी छन् ।

सोमवार प्रेस काउन्सिल र नेपाल पत्रकार महासंघसँगको संयुक्त भेटघाट कार्यक्रममा बोल्दै मन्त्री शर्माले संसदमा पेश गर्न बाँकी मिडिया विधेयकहरुलाई सरकारले तत्काल अगाडि बढाउने कार्ययोजना बनाएको बताइन् ।

मिडिया विधेयक बारेमा सल्लाह सुझाव दिन आग्रह गरिन् । मिडिया र आम सञ्चारको क्षेत्रलाई आवश्यक ऐन कानून र अन्य सम्बन्धित विषयमा सरोकारवाला निकायहरु सहकार्य गरेर सरकारले अघि बढने बताइन् ।

उनले आमसञ्चार क्षेत्रका लागि बनेका कानूनहरु अधिकांश पुराना भएकाले आवश्यकताका आधारमा कानूनहरु परिमार्जन गर्न सरकार तयार रहेको उनको भनाइ थियो ।