मनोज पाण्डेलाई ७ वर्ष कैद सजाय, पीडितलाई ७५ हजार क्षतिपूर्ति दिन आदेश

२३ माघ, काठमाडौं । जिल्ला अदालत काठमाडौंले मानव बेचबिखनको मुद्दा लागेका मोडल ग्लोबल भिजाज कन्सल्टेन्सीका सञ्चालक मनोज पाण्डेलाई ७ वर्ष कैद सजायको फैसला सुनाएको छ ।

न्यायाधीश दीपक ढकालको एकल इजलासले ७ वर्ष कैद सजाय र पीडितलाई ७५ हजार क्षतिपूर्ति दिनुपर्ने फैसला गरेको जिल्ला अदालत काठमाडौंका सूचना अधिकारी दीपक दाहालले जानकारी दिए ।

पाण्डेमाथि ८ वर्षअघि एक किशोरीलाई बलात्कार गरेको आरोप लागेको थियो । पाण्डे त्यो बेला सौन्दर्य प्रतियोगिता गरेको मोडल ग्लोबल भिसाज कन्सल्टेन्सीका सञ्चालक थिए ।

आफूमाथि भएको घटनाबारे किशोरीले घटनाको ७ वर्षपछि केही महिनापहिले मात्र भिडियो सन्देश दिएर विस्तृत विवरण खोलेकी थिइन् । त्यसपछि युवतीले प्रहरीमा उजुरी दिएकी थिइन् । सोही आधारमा पाण्डेलाई प्रहरीले पक्राउ गरी अनुसन्धानपश्चात मुद्दा चलाएको थियो । मुद्दाको अन्तिम टुंगो नलाग्दा सम्मका लागि उनलाई जेल चलाउन गरिएको थियो ।

पाण्डेलाई बलात्कारको आरोप लागेपनि बलात्कार घटनाको उजुरी १ वर्ष भित्रै दिनुपर्ने कानुन भएकाले मानव बेचबिखन र बाल यौन दुर्व्यवहार कसुरमा मुद्दा चलाइएको थियो ।