सुदूरपश्चिममा शक्ति बाँडफाँटबारे सल्लाह गर्न रेशम भेटन रञ्जिता पुगिन् कारागार

२४ माघ, काठमाडौं । नागरिक उन्मुक्तिका संघीय सांसद रञ्जिता श्रेष्ठ चौधरीसहित सुदूरपश्चिम प्रदेश सांसद कारागार पुगेका छन् । पार्टी अध्यक्ष रञ्जिताको निर्देशनमा नागरिक उन्मुक्तिका सांसदहरु सोमबारदेखि नै काठमाडौंकेन्द्रित छलफलमा छन् ।

सुदूरपश्चिम प्रदेशमा सरकारमा शक्ति बाँडफाँटबारे सल्लाहका लागि उनी पार्टीका संरक्षक रेशम चौधरीसँग भेट गर्न मंगलबार डिल्लीबजार कारागार पुगेका हुन् ।

रेशम रञ्जिताका श्रीमान हुन् । उनी २०७२ भदाै ७ मा कैलालीकाे टिकापुरमा भएकाे घटनामा नेपाली प्रहरीका ७ र एक नाबालकाे हत्या घटनामा दाेषी ठहर भइ जेल सजाय काटिरहेका छन् । नागरिक उन्मुक्ति पार्टी रेशमकै याेजनामा गत वर्ष गठित दल हाे ।

उसले टीकापुर हत्याकाण्डमा दोषी ठहर भएर पाँच वर्षदेखि जेल जीवन बिताइरहेका रेशम चौधरी लगायतको रिहाइका लागि अडान राख्दै आएको छ । सुदूरपश्चिम सरकारमा पनि सम्माजनक भाग चाहिने बताइरहेको छ।

रेशमसँग उनीहरुले सुदूरपश्चिममा एमालेबाट मुख्यमन्त्री बनेका राजेन्द्रसिंह रावललाई विश्वासको मत दिने वा नदिने भन्ने विषयमा छलफल गर्नेछन् । मुख्यमन्त्री रावलले यही माघ २६ मा विश्वासको मत लिँदैछन् ।

सुदूपश्चिम प्रदेशमा नागरिक उन्मुक्तिका ७ जना प्रदेशसभा सदस्य (सांसद) छन् । केन्द्रमा रहेको सत्ता साझेदार दलहरुमध्ये सुदुरुपश्चिममा नागरिक उन्मुक्ति पार्टीसहित मुख्यमन्त्रीसँग २९ सिट छन् । नागरिक उन्मुक्तिले साथ नदिएको खण्डमा रावल मुख्यमन्त्रीबाट हात धुनुपर्ने अवस्थामा छन् ।

यो प्रदेशमा माओवादी केन्द्रका १०, एमालेका १०, नागरिक उन्मुक्तिका ७ र एक जना राप्रपाका प्रदेशसभा सदस्यहरुको समर्थनमा गएको पुष २७ गते रावल मुख्यमन्त्री नियुक्त भएका थिए ।

रावलले यसअघि एमालेबाट १ माओवादीबाट एक मन्त्री नियुक्त गरिसकेका छन् । बाँकी मन्त्रालय भागबण्डा गर्न बाँकी छ । माओवादी केन्द्र र नागरिक उन्मुक्तिले ३/३ मन्त्रालय दाबी गर्दै आएको छ । तर, नागरिक उन्मुक्तिलाई २ मन्त्रालय र प्रदेश प्रमुख दिने तयारी रावलले गरेका छन् ।

कैलाली २ बाट निर्वाचित प्रतिनिधिसभा सदस्य अरुण चौधरी ट्याक्टर जलाएको अभियोगमा नागरिक उन्मुक्ति झनै चिढिएको छ ।