सरकारी आईटीको सुरक्षा साँचो सरकारसँग छैन : सञ्चारमन्त्री शर्मा

२४ माघ, काठमाडौं । संचार तथा सूचना प्रविधि मन्त्री रेखा शर्माले नेपाल सरकारको सूचना केन्द्र र आईटी क्षेत्रको सुरक्षाको साँचो सरकारसँग नभएको बताएकी छन् । आईटी क्षेत्रको सुरक्षा सरकारको पहुँचभन्दा बाहिर रहेको सन्देश उनले आजबाट सुरु भएको आइटी मेलामा दिएकी हुन् ।

उनले मंगलबार काठमाडौंमा ‘इन्फोडेभेलपर्स क्यान इन्फो–टेक २०२३’ मेलाको उद्घाटन गरेपछि धारणा राख्दै उनले आइटीको सुरक्षा साँचो कहाँ छन् ? खोज्ने बेला भएको बताइन् ।

आईटी क्षेत्रका दक्ष जनशक्ति विदेश पलायन हुनुले विदेशीहरूबाट सेवा लिँदा सर्भरकाे सुरक्षामा चुनौति भएको स्पष्ट संकेत दिइन् ।
आइटी समस्या आउँदा विदेशबाट मान्छे ल्याउनुपर्ने स्थिति रहेको बताउँदै हाम्रा डेटा सेन्टर र प्रविधिको काम गर्ने निकायको सुरक्षाको मुख्य साँचो नै हामीसँग नभएको बताइन् । आइटीको मुख्य साँचो नै आफूसँग नहुँदा राष्ट्रियताकै कुरा गम्भीर बनेको उनको भनाइ थियो ।

मन्त्रालय वा अन्य मुख्य निकायहरूमा इन्स्टल भएका सफ्टवेयरहरूको डेटा कहाँ जान्छ, त्यसको प्रयोग कसरी भइरहेको छ भन्नेबारे खोजी गर्नुपर्ने बेला भएको उनले बताइन् ।

आफू संचाल मन्त्रालयमा आएको धेरै नभएकोले यसबारे धेरै कुरा बुझन बाँकी रहेको बताइन् । आईटी क्षेत्रमा देखिने गम्भीर समस्याबाट अर्बौं राजश्व गुम्ने र नागरिकको सम्पत्तिको सुरक्षामा समेत दख्खल पुग्न सक्ने संभावनाप्रति आफू गम्भीर रहेको उनको भनाइ थियो । आइटीमा देखिएका समस्यालाई दीर्घकालीन रुपमा समाधान गर्न सरकारले ठोस कार्यक्रम ल्याउने उनले बताइन् ।

केही दिन पहिले मात्र सरकारका आधिकारिक निकायहरुले चलाइरहेको सर्भर नै डाउन हुँदा २ दिनसम्म राहदानी लगायत नागरिकलाई दिइने सेवा बन्द भएको थियो ।