बजार नपाएपछि झापाका किसानले फ्याँके राजमार्गमा अण्डा र कुखुरा

२४ माघ, झापा । बजारमा अत्यन्तै न्यून भाउ पाएकाे भन्दै झापाका किसानले राजमार्गमा अण्डा र कुखुरा फालेर विरोध प्रदर्शन गरेका छन् ।

आफ्ना उत्पादनले उचित मूल्य र बजार पाउनु पर्ने माग गर्दै उनीहरुले बिर्तामोडको मुक्ति चोकमा मंगलबार अण्डा र कुखुरा सडकमा फालेर प्रदर्शन गरेका हुन् । बजारमा भएकाे भाउले लागतसमेत हराउने अवस्था आएपछि विराेधमा उत्रन बाध्य भएकाे उनीहरूकाे भनाइ छ ।

कृषिमा आत्मनिर्भर होउ भनेर सरकारले गरेको आग्रह अनुसार आफूहरु कृषि कर्ममा लागेको र तर उत्पादन भएका सामानले बजारमा स्थान र भाउ दुवै नपाएको उनीहरुको आक्रोश छ । स्वदेशी किसानले उत्पादन गरेको वस्तु र मासुजन्य पंक्षीलाई बजारमा स्थान दिनुको साटो भारतीय वस्तुलाई निरन्तर आयात गरेर किसानलाई हतोत्साहित तुल्याउने काम गरेको उनीहरुको भनाइ छ ।

यही अवस्था रहेमा बैंकको ऋण तिर्न नसकेर किसानले आत्मदाह लगायत अप्रिय बाटो समात्न विवश हुने चेतावनी उनीहरुले दिएका छन् । उनीहरु हजारौं संख्यामा अण्डा र अण्डा पार्ने सयौं संख्यामा कुखुरा सडकमा छाडेर फर्केका छन् । यसबाट सडकमा सवारी आवतजावतमा समस्या परेको छ ।

झापामा किसानबाट ८ रुपैयाँ खरिद गरिएको अण्डा उपभोक्ताले १५ रुपैयाँमा किनेर खान विवश भएको आन्दोलित किसानहरुको भनाइ छ । कुखुरा किसाले प्रति केजी १२० रुपैयाँ कुखुरा बिक्री गर्दै आइरहेकामा उपभोक्ताले त्यही मासुलाई ३५० रुपैयाँ तिरिरहेको बताए ।

विदेशी मासु आयात रोकेर नेपाली किसानको सामानलाई बजारसम्म पुर्याएर लागत संरक्षण र उपभोक्तालाई उचित मूल्यमा सामान प्राप्तिको व्यवस्था मिलाउन सरकारसँग माग गरे ।

यसअघि चितवनमा भारतीइ तरकारीका कारण आफूहरुले उत्पादन गरेको तरकारीको मुल्य शुन्यमा पुगेको भन्दै चितवनका किसानले नारायणगढमा बजारमा ट्रयाक्टरबाट सडकमा तरकारी खन्याएर विरोध जनाएका थिए ।