तह घटुवाको विराेधमा सिभिल बैंकका कर्मचारी पेन डाउनमा उत्रिए

२५ माघ, काठमाडौं । हिमालयन बैंकसँगको मर्जरको क्रममा कर्मचारी समायोजनप्रति असन्तुष्ट सिभिल बैंकका कर्मचारीहरु पेन डाउनमा उत्रिएका छन् ।

एक तह घटुवा हुने गरी कर्मचारी समायोजन गर्न लागिएको विरोधमा बुधबार बिहान १० बजेदेखि २ घण्टाका लागि देशभरका शाखा कार्यालयमा पेन डाउन गरेर विराेध सुरू गरेका हुन् ।

कर्मचारी समायोजनमा व्यवस्थापनसँग छलफल भइरहेको र उनीहरूलाई दबाब बढाउन पेन डाउन गरेको सिभिल बैंकका कर्मचारी युनियनका एक सदस्यले बताए ।

हिमालयन र सिभिल बैंकबीच मर्जरको प्रारम्भिक सम्झौता गत असारमा र अन्तिम मर्जर सम्झौता गत पुसमा भएको थियो । तर एकीकृत कारोबार फागुनबाट सुरु गर्ने तयारी छ । अहिले सफ्टवेयर मिलान, कर्मचारी समायोजन लगायतका काम भइरहेको छ ।

सिभिल बैंकमा रहेको सुपरभाइजर हिमालयन बैंकमा छैन । मर्जरपछि अहिलेको सिभिल बैंकका सुपरभाइजर तहका कर्मचारी सिनियर असिस्टेन्ट हुने भएपछि उनीहरुले असन्तुष्टि जनाएका छन् । असिस्टेन्टबाट अन्य बैंकमा अवसर आउँदा समस्या पर्ने उनीहरुको भनाइ छ । कर्मचारी समायोजनमा सिनियर असिस्टेन्ट पछि अन्य बैंकमा जाने एक तहमाथि सुपरभाइजर हुन्छ ।