एमसीसी सम्झौता कार्यान्वयन गर्न अर्थमन्त्री पौडेलसँग सामन्थाको आग्रह

२५ माघ, काठमाडाैं । नेपाल भ्रमणमा रहेकी अमेरिकी अन्तर्राष्ट्रिय सहयोग नियोग युएसएआइडीकी प्रमुख सामन्था पावरसामन्थाले उपप्रधान तथा अर्थमन्त्री विष्णुप्रसाद पौडेललाई भेटेर नेपालसँग भएको एमसीसी सम्झौता कार्यान्वयन गर्न आग्रह गरेकी छन् ।

उनले बुधबार अर्थमन्त्री मन्त्रालय पुगेर पौडेलसँग सो आग्रह गरेकी हुन् । भेटका क्रममा उनले नेपालको अर्थतन्त्र, नेपाल र अमेरिकाबीचको सम्बन्ध बिस्तारका साथै अमेरिकी सहयोग परियोजना (एमसीसी)को कार्यान्वयनमा जोड दिइन् ।

दुई दिने नेपाल भ्रमणमा मंगलवार काठमाडौं आएकी उनी बुधबार राष्ट्रपति विद्यादेवी भण्डारी र प्रधानमन्त्री पुष्पकमल दाहालसँग भेटेर स्वदेश फर्किने कार्यक्रम छ ।

भेट सकेपछि आजै बेलुका ५ बजे उनले हायात होटल तारागाउँमा पत्रकार सम्मेलन गर्ने भएकी छन् । सामन्थ अमेरिकाको राष्ट्रिय सुरक्षा परिषद्को सदस्य तथा उनी त्यहाँको क्याबिनेटस्तरकी उच्च अधिकारीसमेत हुन् ।