गाउँपालिकाका अध्यक्ष र प्रशासकीय अधिकृतले गरे कर्मचारीमाथि हातपात

२५ माघ, काठमाडौं । धनुषाको मुखियापट्टी मुसहरनिया गाउँपालिकाका अध्यक्षले कार्यालयका कर्मचारीमाथि हतपात गरेका छन् ।

बुधबार गाउँपालिका अध्यक्ष जयकुमार यादवले सोही गाउँपालिकामा कार्यरत अधिकृत छैठौं तहका कर्मचारी श्रवणकुमार यादव र सहायक आन्तरिक लेखा परीक्षक नविनकुमार साहमाथि हातपात गरेको आरोप लगाइएको छ ।

विगत एक महिनादेखि हाजिरी गर्न नदिइएको विषयलाई लिएर गाउँपालिकाको कार्यालयमा विवाद हुँदा अध्यक्ष यादवले उनीहरुमाथि हातपात गरेको कर्मचारीहरुको भनाइ छ ।

साह र यादवले आफूहरुलाई विगत एक महिनादेखि गाउँपालिकाको कार्यालयमा हाजिरी गर्न नदिई अध्यक्ष यादव र निमित्त प्रमुख प्रशासकीय अधिकृत रामपुकार दासले मनोमानी गर्दै आइरहेको बताए ।

लेखा परीक्षक साहले गाउँपालिका अध्यक्ष यादवसहित निमित्त प्रमुख प्रशासकीय दास र अध्यक्ष यादवका बाउन्सर भरत महतोले आफूहरुमाथि कुटपिट गरेको बताए । हातपातमा स्थानीय लक्ष्मी यादवको संलग्नता रहेको उनीहरुले बताए ।

अधिकृत यादव सो गाउँपालिकामा विगत १ वर्षदेखि र लेखा परीक्षक साह विगत ४ महिनादेखि कार्यरत छन् । गाउँपालिका अध्यक्ष यादवले उनको चाकरी गर्ने कर्मचारीलाई मात्रै हाजिरी गर्न दिएको र आफूहरु पनि हाजिरका लागि जाँदाा उल्टै आफूहरुमाथि हातपात गरेको उनीहरुको भनाइ छ ।