धर्म र संस्कृति जोगाउन एकमात्र विकल्प जनसंघर्ष : कमल थापा

२५ माघ, काठमाडौं । राष्ट्रिष् प्रजातन्त्र पार्टी नेपालका अध्यक्ष कमल थापाले सनातन धर्म संस्कृतिलाई योजनावद्ध रुपमा मास्न खोजिएको बताउँदै त्यसलाई रोक्न जनसंघर्ष गर्नुपर्नेमा जोड दिएका छन् ।

आज पार्टीको भक्तपुर जिल्ला समितिद्वारा आयोजित कार्यक्रममा बोल्दै अध्यक्ष थापाले योजनावद्ध र संगठित रुपमा लोभलालच, भ्रम र डर त्रास देखाएर धर्म परिवर्तन गरिएकोमा तीब्र आक्रोशसमेत पोखेका छन् । पछिल्लो चरणमा हिन्दू मात्र नभइ किराँत, बौद्ध धर्ममाथि प्रहार भएको भन्दै उनले संघर्षबाट मात्र धर्म र सस्कृतिको रक्षा हुने बताए । ‘धर्म र ससंस्कृतिमाथिकाे हस्तक्षेप राेक्ने उपाय भनेकाे एक मात्र विकल्प जनताकाे संघर्ष हाे’ उनले भने ।

‘किराँत धर्म अल्पमतमा परेको छ, अब बिस्तारै बुद्ध धर्म मान्नेहरु अल्पमतमा पर्नेछन्, यो सामान्य बिषय होइन,’ अध्यक्ष थापाले भने । यहि रफ्तारमा धर्म परिबर्तनको डढेलो बढ्दै गएमा हाम्रो गौरबशाली संस्कृति र पहिचान नष्ट हुनेतर्फ चिन्ता व्यक्त गर्दै थापाले चुप लागेर बसेमा हामी दिन प्रतिदिन कमजोर हुने भएकोले नयाँ पुस्ताले प्रतिवाद गर्नुपर्ने आवश्यकतामा जोड दिए ।

‘हाम्रो कुनै धर्मप्रति बैमनश्यता ,घृणा र अनास्था छैन, सबै धर्मलाई समान मान्यता र अधिकार हुनुपर्छ तर संगठित र योजनाबद्ध रुपमा भैरहेको धर्म परिबर्तन प्रती हाम्रो आपत्ती छ,’ थापाले भने ।

अहिले कमजोर रुपमा ओझेलमा परेको जस्तो देखिए पनि राप्रपा नेपाललाई आगामी दिनमा बलियो पार्टी बनाएरै छाड्ने थापाको भनाइ थियो ।

पार्टीको उपत्यकाकेन्द्रित संगठन सुदृढिकरण अभियानअन्तर्गत भक्तपुरको ३८ वडामा फागुन महिनाभित्र वडा कमिटी गठन पुनर्गठन गरिने राप्रपा नेपाल भक्तपुरले जनाएको छ ।