ट्राफिक नियमविरुद्धको प्रदर्शनमा यातायात मजदुरले जलाए प्रहरीको गाडी

१ फागुन, काठमाडौं । ट्राफिक नियम यातायात मजदुरको हितविरुद्ध रहेको भन्दै बालाजुको माछापोखरी क्षेत्रमा सडकमा बस तेस्र्याएर गरिएको विरोध प्रदर्शनका क्रममा प्रदर्शनकारीहरुले प्रहरीको गाडी जलाइदिएका छन् ।

अवरुद्ध सडक खुलाउन खटिएका प्रहरी सवार गाडीलाई उनीहरुले केहीबेर अघि घेरा हालेर आगो लगाइदिएका हुन् । प्रदर्शन दिउँसोबाटै सुरु भएको थियो । गाडी पूर्णरूपमा नष्ट भएकाे छ ।

प्रदर्शनमा सयौं संख्यामा यातायात व्यवसायी तथा मजदुरहरू सहभागी छन् । उनीहरुले ट्राफिक प्रहरीले लागू गरेको सवारी नियमविरुद्ध प्रदर्शन गर्दा भएको दोहरो झडप अहिले उग्र बन्दै गएको छ ।

स्थितिलाई नियन्त्रणमा लिन प्रहरीले दर्जनौं थान अश्रुग्याँस सेल प्रहार गरेको छ । बालाजु, माछा पोखरीलगायतका स्थानमा पार्किङ गरिने सवारी साधनलाई नयाँ बसपार्कमा लगेर मात्र पार्किङ गरिनुपर्ने नियम बनाइएपछि यातायात व्यवसायी र मजदुर आक्रोशित बनेका हुन् । नियम बनाउन काठमाडौं महानगरले समेत साथ दिएको छ ।

उनीहरुले सामान्य गल्तीमा समेत ट्राफिकले १५०० रुपैयाँ जरिवाना गरेको भन्दै हटाउन माग गरे ।